Inkszo: Przemyśliwania ôd mojij mamulki
Pora lot nazod moja muter miała szejśdziesiōnty geburstag. Mie latoś piźnie trzidzieści i prziszłach ku tymu, że sie spytōm tyj mojij mamulki, co by doradziyła takim dziywōm jak jo. Muter se wziyna moji pytani do serca i narychtowała kupa zocnych porad. A brzmiało to mnij wiyncyj tak:
Niy żyj dycki wizjōm urlaubu i rajzōw. Życi toczy sie terozki i akuratnie tukej. I to życi tyż może być cacane, yny dobrze na niy pojrzij.
Patrz sie starać sama ô sia, bo jeżeś do siebie nojważniejszōm personōm we świecie.
Nie trać tela geltu na szuły. Chopy i tak nie zaglondajōm na twoji szłapy.
Przej i miej w zocy swoja familijo i kamratów. Traktuj wszyskich tak, jako byś chciała, coby ciebie traktowali.
Wiek to sōm yny nōmery. Tak rychtyk ôd ciebie zależy, czy kiej bydziesz starym, gderliwym purtym.
Dycki rajzuj, czytej i ruszej sie.
Nie starej sie tela ô wszysko, co sie teroz wydarzo. Niyskorzij bydziesz widzieć, że ganc sie nie spłacało tak sie sztresować.
Wynauczej sie wyboczać. Bez tego bydzie ci ciynżko w życiu.
Żyj po swojimu, a nie tak, jakby tego chcieli inksi.
Być perfekcyjonistōm je blank niyzdrowo. Raus z tym!
Dziynnie godej ludziōm, kierym przajesz, jacy sōm do cia ważni.
Niechej rozmyślowania ô tym, co myślōm ô ciebie inksi. To je niyherski zwyk, bo kożdy je inkszy: jednymu sie przipodobosz, a drugimu niy.
Chichrej sie sama ze sia! Nie bydź tako poważno!
Niy miyj strachu. Antlich wszysko dycki sie dobrze ukłodo.
Z wiekiym kupa rzeczy robi sie coroz prostszo, a mecyje przestowajōm być mecyjami. Luzuj.
Dalszŏ tajla artykułu niżyj
Niy ma co odkłodać życio na jutro, na za tydziyń, ani na bezrok. Trza sie ciyngiym radować z tego, co nōm ône przinosi! A jak sie co nie podobo, to trza to zmiynić, podwiela idzie.
A na fajrant jeszcze mōndry cytat:
“Wszyjscy chcōm twojigo dobra. Nie dej se go ôdebrać” – jako pedzioł Stanisław Jerzy Lec.
Małgorzata. Ślōnskŏ rajzowiczka spod Wodzisławia, frelka wrazidlatŏ i dociyrnŏ. Durch w gangu, rajzuje, furgŏ na paralotni, sztyjc kajś lŏce i pochŏ wiela wlezie. Przaje ślōnskij gŏdce, autōrka tekstów na Wachtyrz.eu i Inkszo.pl.