Słōż sie swojã włŏsnõ gazytã na mobilniŏku!
Bez ôstatnie lata prziwykli my do Facebooka i to stamtōnd bierymy wiadōmości. Niynojlepsze informacyje, co płynōm ôd marca 2018 z tyj firmy kŏżōm zastanowić sie, jeźli je syns trzimać kōnto na tym portalu, jak sami prziznali sie, iże jak sie mŏ u nich kōnto, to pewnikym nasze informacyje prywatne ftoś kejś sie wziōn.
Możno i niy trza zarŏz kasować kōnta, ale dobrze je zabezpieczyć i pōmyśleć tyż nad inkszōm sprawōm. Facebook używŏ algorytmu, żeby pokazować ludziōm posty jejich znajōmych i fanpejdzōw, co ôni im przajōm. Beztōż z wiadōmości pokazujōm nōm sie ino niykere, co mogōm nŏs interesować. Skuli tego dobrze wejzdrzeć na RSS.
RSS to sprawdzōnŏ internetowŏ technologijŏ czytaniŏ wiadōmości we internecie. Mōmy jakiś blog, co go radzi czytōmy? Chcymy dycki dostŏwać wiadōmości ze jakigoś serwisu zarŏz po ôpublikowaniu? Mogymy je abōnować bez RSS. Wachtyrz tyż mŏ taki strumiyń, a jego adresa to:
Dalszŏ tajla artykułu niżyj
To feed to je standardowe ôznaczynie RSS we serwisach, co fungujōm we technologiji WordPress. Wejzdrzijcie na inksze lokalne serwisy:
- Blog ôd Łukasza Tudzierza: http://tuudi.net/feed/
- Blog ôd Rafała Szymy: http://oschl.wordpress.com/feed/
- Wochenblatt.pl: http://wochenblatt.pl/feed/
Niy trzeba zarŏz cołkigo serwisu abōnować. Na Wachtyrzu idzie dostŏwać artykuły ino z tych kategoryji, co nŏs interesujōm:
- Bez tydziyń: http://wachtyrz.eu/kategoryjo/bez-tydziyn/feed/
- Blogi: http://wachtyrz.eu/kategoryjo/blogi/feed/
- Kultura: http://wachtyrz.eu/kategoryjo/kultura/feed/
- Nowiny: http://wachtyrz.eu/kategoryjo/nowiny/feed/
- Ôpinije: http://wachtyrz.eu/kategoryjo/opinije/feed/
- Pauza: http://wachtyrz.eu/kategoryjo/pauza/feed/
- Sport: http://wachtyrz.eu/kategoryjo/sport/feed/
Do programōw do czytaniŏ wiadōmości idzie importować zbiory OPML. Take zbiory sōm po to, żeby niy trza było wpisować strōny za strōnōm, ino zarŏz abōnować pŏrã strōn w jednyj chwili. Beztōż narychtowali my przikładowy taki zbiōr. Idzie go zebrać, wciepnōńć do swojigo wybranego programu i sprawdzić, czy RSS nōm pasujōm. Potym idzie tyż skasować te strumiynie, co nōm sie niy podobajōm abo dodać inksze. We zbiorze mōmy:
- Ślōnsk: Wachtyrz, Zwrot.cz, Gorolweb.cz, Onet Śląsk, Onet Opole, iDNES Ostrava, Silesia News, Wochenblatt
- Ôkolica: Gazeta.pl, Rzeczpospolita, iDNES, Kafkadesk
- Świat: Gazeta.pl Świat, Rzeczpospolita Świat
- Inksze: Bankier.pl, Next.Gazeta.pl, Sport.pl
- Ślōnske blogi: Blogi na Wachtyrzu, Chop w kuchni, oschl.wordpress.com, Inkszo.pl, bele kaj, Tuudi.net, Odkrywając Śląsk, Na krańcu Królestwa, Górny Śląsk wg Marasa, Utrŏpy Micyny
Zbiōr OPML idzie ściōngnōńć sam: rsswachtyrz.opml
Używanie RSS je bardzo kōmfortowe. Wszyjske wiadōmości mōmy w jednym miejscu i nic niy tracymy. Idzie je przeglōndać na mobilniŏku i na kōmputrze, a do tego używŏ sie ekstra programōw.
Na strōnie, na Androidzie, na iOS:
Wersyjŏ na Android we sklepie Google Play
Feedly to je absolutny lider we świecie RSS. Na mobilniŏku zebierōmy aplikacyjõ ze sklepu i mogymy abo dodŏwać strumiynie, co już sōm dostympne, abo swoje. Mogymy nawet importować swōj zbiōr OPML. Idzie to samo zrobić bez strōnã. Jak sie kliknie w tyn trybik nad wykŏzym abōnowanych strōn, pokŏże nōm sie strōna ze sztelōnkami i z prawyj strōny na wiyrchu je knefel „Import Opml”.
Na Android:
Jak sie niy chce ôtwiyrać nowego kōnta nikaj, to idzie tyż użyć bez przikłŏd aplikacyje RSS Reader i dō nij zaimportować abo wpisać strumiynie. Funguje tak samo.
Na kōmputer (Windows, Linux, Mac):
QuiteRSS – nojlepszy chyba program do czytaniŏ wiadōmości. Idzie w nim nasztalować swoje skrōty tastatury, idzie czytać we samym programie abo tyż we przeglōndarce systymowyj.
RSSOwl – te same funkcyje, co QuiteRSS.
Mozilla Thunderbird, program do czytaniŏ poczty Email, tyż poradzi czytać RSS.
