Skrōł narkotyki w pudełku po strzewikach

Kryminalni z Piekŏr chyciyli 34-latka, co we swojim pōmiyszkaniu mioł bez 2 tys. dziołkōw dilerskich amfetaminy. Plac, kaj skryte były narkotyki, pokŏzoł szandarōm pies sużbowy. Miyszkaniec krysu tarnogōrskigo usłyszoł już ôbskażynia. Może dostać do 10 lŏt heresztu.

Policjanciŏ wydziału kryminalnego piekarskij jednostki, przi ryalizowaniu postaniowiyniŏ prokuratora, poszli do miyjsca, co w nim 34-latek miyszkoł. W czynnościach bōł tyż ôkludzŏcz społym ze psym sużbowym, przeszkolōnym we szukaniu narkotykōw. Psi nos zaś pokŏzoł, co poradzi. W jednyj z izbōw, we szranku szandarzi znŏdli szachtelkã po strzewikach, a w nij bojtel z biołym pulwrym. Narkotykōw było ale wiyncyj. W sumie, dziynki przeszukaniu pōmiyszkaniŏ 34-latka, wachtyrze prawa przejōnli bez 2300 dziołkōw dilerskich amfetaminy jak tyż 5 pilōw – nojpewnij ekstazy, co na kōńcu potwirdzōm podszukowania laboratoryjne. Szandarzi znŏdli tyż mobiniŏki, wŏgi elektrōniczne jak tyż replikã brōni. Na poczet prziszłych sztrŏfōw zabezpieczōno było blisko 3 tys. zł. Chop usłyszoł już ôbskarżynia i dostoł policyjny dozōr. Może dostać do 10 lŏt wiynziyniŏ.

Zdrzōdło: KMP Piekary Ślōnske