Nowiny

Rybnik: Cyntrum do przesiodanio sie

Przi ul.Kościuszki, kole banohowa stawiajōm cyntrum do przesiodanio sie, co bydzie noleżało do zistymu zrōwnoważōnej mobilności miejskij.

Cyntrum do przesiodanio sie kole banhowa bydzie miejscym dlo kolorzi, kaj bydōm sztyndry na koła, szranczki, szyldy, ławki a hasioki.

Ludzie, co jeżdżōm do roboty np. cugym do Katowic, bydōm mōgli przijechać na banhōw na kole, ôstawić go tam pod szyldym zanknyte, a jak przijadōm nazod, to zaś siednyć na koło.

Na cołkim placu bydzie poukłodano trelinka, bydōm grzōndki na kwiotki a trowniki. Postawiōne bydōm tyż ławki z egzotycznego drzewa.

Dalszŏ tajla artykułu niżyj

Cyntrum do przesiodanio sie, to je jedyn z elemyntōw, co płaci za to UE, a przinoleżōm ku tymu tyż miedzki dlo kołōw. Inksze rzeczy, co ku tymu przinoleżōm, to sōm cyntra do przesiodanio sie przi banhowie na Paruszowcu a na Banhowie dlo Autobusōw, ale tyż miedzki wzdłōż ul.Żorskij, Raciborskij, a kōnsek tyż pogroble kole Nacyny .

Człość, to je siedym zadaniōw – pado Prezidynt Rybnika Piotr Kuczera. Trzi zadania, to je postawiyni cyntrōw do przesiodanio sie, coby szło tam ôstawiać koła, abo auta. Sztyry inksze zadania, to je szykowani miedzek dlo kołōw.

Na cołki tyn projekt udało sie Rybnikowi dostać ze Unije praje 10 mln zł.

Fotografije: Agnieszka Skupień (UM Rybnik)

Społym budujymy nowo ślōnsko kultura. Je żeś z nami? Spōmōż Wachtyrza

Neblik Stanisław

Stasiek Neblik, ps.”Fojerman” – Ślōnzok, fojermōn na pynzyji, autor ksiōnżki ”Do rymu po naszymu, abo ślōnski miszmasz” a autor „Dykcjōnorza Godki Ślōnskij”, człōnek DURŚ.

Ôstŏw ôdpowiydź