Przeglōnd tydnia na gōrnoślōnskich szpilplacach #2
We Korei dalyj trwały Zimowe Igrzyska Olimpijske, ale dzieje sie też już wiela we gōrnoślōnskich ferajnach.
Grŏ już polskŏ Ekstraklasa, a w niyj nasze ferajny.
Ślōnsk Wrocław zrymisowoł 1-1 ze Gōrnikym Zŏbrze. Strzylanie już w 8 minucie napoczōn Michał Koj dlŏ Zŏbrzŏ. Wyrōwnoł we 66 minucie Arkadiusz Piech. Szansã na zwyciynstwo Zŏbrzan zmarnowoł w 87 minucie nojlepszy strzelec Zŏbrzan, Bask Igor Angulo, kery przestrzelōł elwra.
We drugim szpilu Piast Gliwice 0-0 u siebie zrymisowoł ze Wisłōm Krakōw.
Dalszŏ tajla artykułu niżyj
Gōrnik je 4., a Piast 13.
W Republice Czeskiej srogi sukces ôdnotowoł MFK Karviva, kery wygroł 4-0 ze Fastavym Zlin. Gole strzelili Lukáš Budínský we 32 minucie z elwra, Tomáš Wágner we 39 i 74 minucie, a Marek Janečka we 49.
Banik Ostrava zrymisowoł we Teplicach 0-0 i dalyj je ôstatni. Spokojniyj śpiōm we Karvinyj, kerŏ awansowała na 10 plac w lidze czeskej.
I we Polsce i we Czechach pauzowała jeszczy drugŏ liga.
