We Rydōłtowach padajōm „Jeżech stond” a czytajōm po ślōnsku i malujōm

W tych Rydōłtowach to niy yno poradzōm piyknie godać po ślōnsku, ale tyż poradzōm piyknie malować, a chce im sie coś robić. Rechtorki ze Szkoły Podstawowej nr 4  – Ewa Kolbusz, a Adriana Piwońska nauczyły sie na kursie ôd Fundacyje antyRAMA ze Katowic jako pisze sie projekty ô roztomańte granty ze ministerstwa, a napisały projekt dlo dziecek „Jeżech stond”, kaj dziecka trefiały sie ze fesztrami, pszczelorzami, ale tyż ze … Fojermanym, kery poczytoł im swoji wierszyki.

Rechtorki napisały  projekt, Ministerstwo Kultury dało trocha kasy, dyrechtorka szkoły sie zgodziyła, tōż tak powstoł Kōnkurs poetycko-plastyczny „Malowane wiersze” dlo klasōw 1-3 ze wszyskich szkōł we Rydōłtowach. Dziecka miały na zadani namalowani na szkartce A4 malōnku z jednego z dwōch wierszōw ôd Fojermana: „Jak szczoły poszły do szkoły”, abo „Ô piesku, co poszoł do frizjera”. Na kōnkurs posłanych było 115 malōnkōw, z czego jury dopuściyło 85 podle regulaminu. Malōnki były potajlowane podle klasōw: 1, 2, 3 i we kożdej grupie były 3 nadgrody za place 1 – 3, a 5 wyrōżniyń. Wszyskich nadgrodzōnych dziecek było 24, dyć i inksi niy ôdeszli ze prōznymi rynkami, bo coś tam kożdy dostoł. Wiycie, co te jury miało za ciynżki wybōr. Dobrze, co tam byli w jury dyrechtorka Biblotyki we Rydōłtowach, ktoś ze UM, a dyrechtor Państwowego Ogniska Plastycznego, bo jo bych musioł dać nadgrody dlo wszyskich, niy poradziōł bych wybrać tych nojlepszych.

12 grudnia, bōł we Biblotyce we Rydōłtowach Finał Kōnkursu „Malowane wiersze”. Prziszły wszyski zaproszōne dziecka ze rechotrami, abo ze swojimi ôjcami. Panie Ewa Kolbusz i Adriana Piwońska prziwitały piyknie wszyskich gości, podziynkowały dzieckōm na udział we kōnkursie, ale tyż rechtorōm, a inkszym przocielōm za pōmoc. Potym jeszcze Fojerman poczytoł wierszyki ô pszczołach a piesku i zaczło sie rozdowani nadgrodōw, zaczli ôd wyrōżniyń, a na kōniec za place 3, 2 i 1. Było dużo uciechy, winszowanio, a na kōniec spōlne fotki. Szło tyż napić sie kafyju, abo tyju i zjeś po kołoczku a jeszcze roz podziwać sie na wszystki posłane malōnki. To bōł rychtyk piykny czas, niy yno dzisiejszy dziyń, ale cołki czas trwanio kōnkursu, wybiyranio nojlepszych malōnkōw, trefōw. Dziynkujymy paniōm rechtorkōm, co chciało im sie chcieć, a namōwić dziecka do czytanio po ślōnsku, a malowanio. To sie mianuje bezmała Edukacyjo Regijōnalno. Na geszynki dostały dziecka miyndzy inkszymi ksiōnżki ôd Fojermana a ôd Silesia Progress „Bojki Fojermana”, „Ôzprowki a opowiadania Stanika Fojermana”.

Dziynkujymy piyknie na naszykowani takigo fest udanego kōnkursu. Malōnki na razie idzie ôglōndać we Biblotyce we Rydōłtowach, a potym możno zeskanujymy co i wrażymy na „Giskana Fojermana”

Dalszŏ tajla artykułu niżyj

Stanisław Neblik – Fojerman