Niy ma nadzieje dlŏ ludzkości, 19.08.2018
- patrōna we aucie
- ôpera na fol
- wyższe niypołne
Co robić, jak sie znojdzie starõ patrōnã przeciwlotniczõ? Normalnie sie zwōni po dinsty, co sie znajōm, bo dyć jak dupnie, to ino rŏz. Ale dwie kobiyty z Bytōmia miały lepszõ idyjõ. Wraziyły patrōnã do auta, wziōnły bajtla ze sobōm i pojechały sie ôddać jã do bytōmskij jednostki wojskowyj. Pod jednostkōm zarŏz sie zrobiōł alarm, sjechały sie dinsty, a baby terŏz majōm sprawã ze prokuratorym.
Widać, że dŏwno wojny niy było.
Zdrzōdło: Wachtyrz
Dalszŏ tajla artykułu niżyj
Baba we Słowacyji miała doś psa ôd sōmsiadōw, co durch szczekoł, tōż puściyła głośno bez swoje stereo ôperã. 16 lŏt tymu. I grało do terŏz. W pyńdziałek trefiyła do heresztu i terŏz dostanie ôbskarżynie napasztowaniŏ. Ôna grała 4-minutrowõ aryjõ ze „La Traviaty” ôd rana do wieczora.
Tytuł aryje to je „Upadłŏ kobiyta” i je w tym jakŏś metafora.
Zdrzōdło: Parameter.sk
Na Florydzie hned welōnek. Kandydatka, co jij je Melissa Howard, pisze na swojij strōnie internetowyj, iże mŏ licyncjat. Jedna gazyta sie wejzdrzała do zŏpisōw we internecie i je w nich napisane, że skōńczyła sztudyjõ, ale ani niy brōniyła licyncjatu, tōż go niy mŏ. Ôna pokŏzała na Facebooku dyplōm i fotografijõ we tradycyjnyj amerykańskij todze i gazyta sie wycŏfała. Ino że wtynczŏs ôdezwoł sie tyn uniwersytet, co ôna pokŏzała jego dyplōm, i pedzioł, że ôni ani takigo kerōnku niy majōm.
Coś tam, coś tam, wyższe niypołne.
Zdrzōdło: Washington Post
