Niy ma nadzieje dlo ludzkości, 18.08.2019

Jakiś sześ lot mody synek we USA niy bōł niy mioł szczyńścio do ôjcōw. Wymyślyli sie, że niy bydōm go szczepić, bo przeca szczepiynia przinoszōm autyzm i dyszcz, bo tak we internecie stoji.

Synek sie jednego dnia ôbalōł i rozciōn sie czoło. Ôjcowie mu ôbmyli rana i tak to ôstawiyli, a za pora dni trefiōł do lazarytu, bo dostoł tynżca. Cołke lyczynie wziōnło 47 dni i 800 tysiyncy dolarōw, a ôjcowie durch niy chcōm chopca zaszczepić.

Nojlepszy przikłod na to, że ôjcōw sie niy wybiyro.

Zdrzōdło: LiveScience

Dalszŏ tajla artykułu niżyj

We Hiszpaniji szofer prziszoł na policyjo i pedzioł historyjo ô tym, że ftoś go porwoł, wziōn mu cołki geltag, i kozoł nafutrować sie narkotykami we seksklubie kole Malagi. Podyjzdrzany hned trefiōł do heresztu i cołko sprawa miała być wartko rozwiōnzano, jak pokozało sie, że ôba chopy to sōm kamracio ôd fajrowanio i ôba sami z siebie wszyjsko zrobiyli, a szofer chcioł tak skryć swōj byzuch we seksklubie.

Zaroz sie pokoże, że chop niy mo żōny, co by przed niōm mioł to wszyjsko kryć, i bydzie hiszpańske archiwum X.

Zdrzōdło: El País

We USA (zaś) baba robiyła za ôchrōna na lotnisku. Jak chop przechodziōł bez bramka, to ôna mu dała kartka papiōru, co na nij napisała „You ugly” (Żadnyś). Baba już niy mo roboty.

Zdrzadła w dōma chyba tyż niy.

Zdrzōdło: ABC7