Na gōrnoślōnskich szportplacach, 12.05.2019

Fusbal

We lidze czeskej bez rewelacyji: Banik zajś przegroł, MFK Karwina je na przedôstatnim placu i do samego kōńca bandzie walczōła ô utrzimanie. Szpil wygroł yno Slezsky Ôpawa i je na piyrszym placu we grupie, kaj walczy sie ô utrzimanie.

SFC Ôpawa – Dukla Praga 3-2
1. FK Przibram – MFK OKD Karwina 1-0
FK Jablonec – Banik Ôstrawa 2-0

We lidze polske utrzimoł sie Górnik Zŏbrze, kery na Dolnym Ślōnsku wygroł 0-1 ze Miedziōm Legnica. Po fest słabym poczōntku sezōnu Górnika Zŏbrze, je to blank udanoł kōńcōwka fusbalerōw ôd trynera Marcina Brosza.
Ale ważniejsze rzeczy dziejōm sie we grupie, kerŏ grŏ ô majstra. Piast Gliwice wygroł 2-1 ze Jagiellōniōm Biołystok, a Legia straciōła u siã punkty ze Pogōniōm i manszaft ze Gōrnego Ślōnska na dwa szpile do kōńca wylŏz na piyrszy plac w tabuli! Wiyncej ô szpilu ze Jagiellōniōm Białystok poczytŏcie we fotorelacyji Marcina Musiała tukej.

Handbal

We lidze czeskiej napoczōn sie finał Talent Robstav-M.A.T. Pilzno – HC Banik Karwina. Manszaft ze Gōrnego Ślōnska przegroł piyrszy szpil we Pilźnie 31-27 (17-16). Groł sie do 3 wygranych szpilōw. Szansa na wyrōwnaniy już w strzoda, kiedy to handbalery bandōm grać we Karwinej.

Tenis

Petra Kvitová, kerŏ mŏ drugi plac we rankingu WTA, miała szansa wygrać latoś 3 turniej. Nadzieje bōły sroge, bo łōńskego roku wygrała we Madrycie. Latoś nie poszło jyj tak dobrze i ôdpadła we 1/4 finału ze Kiki Bartens ze Holandyje 0-2 (2-6, 3-6).

 

Foto tytułowe: Pavel Lebe-da / Česká sportovní [CC BY-SA 3.0], via Wikimedia Commons