Ślōnskŏ Wikipedyjŏ: Rejester pōmianōw 2024-2025
Kej Ślōnskŏ Wikipedyjŏ kole 18 lŏt do zadku powstŏwała, internet bōł blank inkszy. Dzisiej mōmy translatory, AI, autōmatyzacyje i fermy botōw, piyrwy za to starsze pokolynie i masa ciyrpliwości do ryncznyj roboty. We tym meldunku dōmy pozōr na to co my przi tych pōmianach bez ôstatnie dwa lata szafli, na nowe funkcyje, zagrożynia do Wikipedyje i czamu durch sie werci ja redagować.
Jak sie darziło prandzyj i co we styczniu 2024 spodziewane bōło, ôpisane je we artiklu Śląska Wikipedia – podsumowanie ponad 15 lat istnienia.
2024 i 2025 we nōmerach
| Nowe artikle (w tym „kōnski artikli”) | kole 2100-2400 |
| Edycyje ôd ludziōw | 10241 |
| Nowe wyrōżniōne artikle | 1 („Bioły damfer”) |
| Wyświetlynia | dane ze desktopōw falszywe skuliś botōw |
| Strzedniŏ manga edytorōw ze aby 5 edycyjōma, na miesiōnc | 8 |
| Nałożōne szpery na kōnta | conajmnij 43 |
Sztatystyka wyświetlyń ôstatnich 10 lŏt z mobilnych gerejtōw podug Wikimedia Statistics:
Dalszŏ tajla artykułu niżyj
Społeczne wydarzynia
| Kedy | Kaj | Co |
| 2024 – 2025 | Przodniŏ zajta | 29 wpisōw do tajle przodnij zajty „Wiedzieli Żeście…” |
| 03.2024 | Wikipedyjŏ | 58.000. artikel – Tati Siding |
| 08.2024 | Katowice, Spodek | Wikimania – kożdorocznŏ kōnferencyjŏ ôd Wikimedia Foundation bōła goszczōnŏ na Ślōnsku. We panelu „Key Partner session: Silesian Wikipedia panel” przidanŏ bōła ślōnskŏ i inksze małe Wikipedyje pod analiza. Szło ze ekspertōma poôsprawiać ô celach, możliwościach pōmoce i zagrożyniach, jak tyż niyskorzij zônaczyć z tego raport |
| 11.2024 – 06.2025 | Meta zajty | Miesiōnc na tymat – cykliczny projekt społeczności Wikipedyje, w kerym pisali’śma a udoskonalali artikle, co tykajōm sie ôkryślōnego tymatu (Ślōnsko kuchyń, Ślōnsko literatura, Ślōnske rzyki i jeziora, Katowice, Naukowce, Myńszości we Polsce a Czeskij Republice) |
| 07.2025 | Wikipedyjŏ | 59.000. artikel – Szofirkon |
| 10.2025 | Glywice/ Zobrze |
Kopalnia Wiydzy – edytōn we postrzodku kopalnie Guido |
| 11.2025 | Wikipedyjŏ | Wyrōżniyniy artikla „Bioły Damfer” |
Tychnicznŏ robota
| Kedy | Kaj | Co | Werkcojgi |
| 08.2024 | Kategoryje | Skōplowaniy roztōmajcie pisanych kategoryjōw pod jedyn muster we steuerowym szrajbōnku | API, Bot |
| 08.2024 – 10.2025 | Kategoryje | Auto-reparatury gŏdkowych felerōw we mianach ôd kategoryjōw (6 mustrōw) | Bot |
| 10.2024 | Motor MediaWiki | Wkludzyniy tastatury „Silesian tilde” we interfejs (zapis ~1 wciepuje litera ō, ~2 wciepuje litera ô, atd.) | Universal Language Selector |
| 02.2025 | Prawidła | Regulacyjŏ do GenAI: „Niy ma do zgody wciepowaniy blank maszinowo wygenerowanych tekstōw bez przepisaniŏ jich ôd nowa po swojymu” | Kōnsynsus |
| 10.2025 | Artikle | Pōłautomatyczne pucowaniy felerōw lintera (edytōn Kopalnia Wiydzy) | Skrypty JS |
| 10.2025 | Mustry | Ôrtograficznŏ adaptacyjŏ (ślabikŏrzowy/steuerowy szrajbōnek) do 926 wywołaniōw mustra {{Stub}} | Bot |
| 10.2025 | Polske wsie i miasta | Reparatura wywołaniōw paramyjtra galeryjo_commons we infoszachtlach (feler ôd maszinowych przemianowaniōw ze 2023) | Bot |
| 11.2025 | GUI | Prziwrōcyniy po 10 latach funkcyje „Dej znać ô felerze ” | Gadgets, antrag do stewardōw |
| 12.2025 | Meta zajty | Identyfikacyjŏ i aktualizacyjŏ meta-zajtōw, nowŏ przodniŏ zajta pōmoce | API |
| 12.2025 | Motor MediaWiki | Piyrsze testy filtrōw do wartkij identyfikacyje niytypowych sprowiyń | Mustry ze inkszych wiki |
Nowiny poza projektym
Srogi ajnflus mioło normowaniy sie regułōw do gramatyki i ślabikorzowyj ôrtōgrafije, nowŏ literatura i popularyzacyjŏ gŏdki. Do ważniyjszych werkcojgōw dŏ sie zajś wkludzić dykcjōnŏrze, translatōry, korpusy, modele LLM, inteligyntne boty i ślabikŏrze. Kŏzdydniŏ robota na Ślōnskij Wikipedyji mŏ bezto kōmfort ô jakim piyrwy szło ino pomarzić i je fest barzyj profesjōnalnŏ. Z inkszyj ale zajty, nojwiynkszy koszt utrzymaniŏ Wikipedyje we 2025 niy bōły serwery, atoli trzimaniy erbizny ślōnskij gŏdki we larmie ôd eksperymyntōw.
Nowe zagrożynia
Spam stoł sie tōńszy i barzij masowy, generatory ślōnskij gŏdki lepsze i dostympniyjsze, a boty (masziny do wciepowaniŏ edycyjōw) inteligyntniyjsze. Szłoby pōmyśleć, iże ludzie sōm już bezpotrzebni, nale kole grajfnyj, maszinowyj roboty je po prŏwdzie tyż fura paskudnych felerōw. Be tak jescy dugo skuliś tego, że inteligyntne masziny bajstlujōm sie ôd cyfrowych danych, kerych ślōnskŏ gŏdka niy mŏ kanc we przirōwnaniu do danych, kere ludzie erbli ôd praôjcōw. Mimo to take boty sōm już aktywne, a przi tym jich halucynacyje poradzōm być niywykryte za take na wartko. Typowe felery i spōsoby wykryciŏ maszinowego spamu sōm zebrane na ślōnskij Wikipedyji, nale lista durch je aktualizowanŏ i dojś ôgōlnikowŏ. Ôkrōm gŏdkowyj erbizny zagrożōnŏ je fundamyntalnŏ reguła – neutralne wejzdrzyniy. Masowe sprowianiy powoduje co jigo autōr moge sie ajnfachowo zrobić ze Wikipedyje plac do reklamy. To samo tyczy sie rewizorōw kaj zbyt mocno krytyczne sztalowaniy sie przi rewizyjach moge zmaścić ôtwartość projektu. Inksze zagrożynia to srogi prōg wejściŏ do nowych edytorōw, braki kōmpromisōw do prawideł we projekcie i tychniczny bajzel. We 2024-2025 nasza siyła wolōntariatu, nowe werkcojgi, testy botōw we swobodnyj dyskusyji i reguła aby jednyj rewizyje bōły we utrzimaniu jakości ôsobliwie przidajne.
Czamu Ślōnskŏ Wikipedyjŏ durch werci sie edytować?
Przede wszijskim: durch masa tymatōw niy ma ôpisane. Brakuje zajtōw ô nauce, tychnice, lokalnych gyszichtach, artystach, ferajnach, brakuje tyż rewizyjōw a użyć knefla „Dej znać ô felerze” do tego co już je. Piyrszy rŏz edytować może niy ma leko, nale niy trŏpta sie, zajty pōmoce i wolōntariusze rŏd bandōm Wōm pōmōc. Werci sie, bo spisanŏ wiydza niy potraci sie bez stolecia. Styknie pejdzieć, że nowiny ze sekcyje „Nowiny poza projektym” ze ajnflusym ôd Wikipedyje bōły formowane. Wolōntariat na Ślōnskij Wikipedyji to masa pożytku, samorozwoju a szpasu.
