Ô starych zwōnach z XV wieku ze Kościoła Trōjce Świyntej we Radzijowie a Popilowie
Słyszeliście kery ô Zwōnie Zygmunta we Krakowie? Nō toć, wszyscy, pra. A ô zwōnach z kościoła we Radzijowie a Popilowie żeście możno niy słyszeli. A sōm ône starsze ôd tego krakowskigo „Zigusia” ô wiyncyj jak ô sto lot. Nō ja, ale niykerzi z Wos możno niy słyszeli ani ô Radzijowie a Popilowie, tōż trocha Wōm ô nich ôpowiym.
Dzisiej Radzijōw (Radziejów) a Popilōw (Popielów) , to sōm dzielnice Rybnika, a piyrwej (do 1975) noleżały do Gminy Niedobczyce, a jeszcze downiyj gmina była we Popilowie. Ale czamu jo Wōm ô tym pisza? Jo żech sie urodziōł we Radzijowie, wtedy to były „Niedobczyce 4”, podle poczty. Radzijōw ze Popilowym to sōm dwie wsie, ale kościōł i kerchōw miały dycko jedyn. Teraz bezmała i szkoła majōm jedna, bo ta radzijowsko, co jo żech dō niyj chodziōł, to już je yno filijo ôd tej popilowskij. Dyć jo mioł sam pisać ô zwōnach, a zwōny te wiszōm we kościele. Wiym ô tym, bo tyż pora razy prziszło mi nimi zwōnić za łebka, jak mie pani Ela tam posłała.
Pamiyntōm, że ciynżko było te zwōny rozhuśtać tōm sznōrkōm, za to na kōniec szło sie powiesić na tej sznōrce a furgać pora razy w lufcie do gōry, aż zwōny stanyły. Było to za czasōw farorza, ks. Wrzoła. Dzisiej zwōny te możno niy majōm już tych sznōrōw, a tyż żodyn niy zwōni nimi na kożdy dziyń, bo w kościele ôd 1979 roku sōm trzi nowe zwōny, a ône tyż niy majōm sznōrōw, yno puszczo sie ich bez elektryka. Dyć my mōmy godać ô starych zwōnach. Kościōł we Popilowie postawiyli w latach 1933-34, ale downiyj stoł kościōł drzewianny, tam kaj dzisiej je kerchōw. Piyrszy drzewianny kościōł św. Anny postawiyli, tak piszōm, w 1447 roku. Roztomańcie potym z nim było, bōł jakiś czas zawrzyty, jak sam były Husyty, aż całkiym bōł zniszczōny.
Nowy kościōł, św. Anny, tyż drzewianny, poświyncōny bōł 7 listopada 1723 r, a stoł do roku 1942 i wtedy zgoroł. Ale zwōny ôstały i były zaniesiōne do nowego kościoła i teraz pora słōw ô tych zwōnach. Tyn myńszy je starszy, z 1486 roku, a tyn wiynkszy z 1496 roku. Wiszōm, tak jak żech już pisoł, we kościele w Popilowie. A czamu ô tym pisza? Ôbejrzoł żech praje film ô zwōnach, co na nim teraźny farorz, ks. Tondera ôpowiado ô tych zwōnach. Sōm to bezmała jedne z nojstarszych, a możno i nojstarsze taki zwōny kościelne na Ślōnsku. A możno Wy znocie jaki starsze zwōny? Farorz Tondera doł wpisać te zwōny do zabytkōw, a możno kedy bydzie szło sie na ni podziwać, jak ich trocha ôdpucujōm, a możno i zaniesōm na inkszy plac, kaj bydzie lepsze ku nim dōńści. Tōż tela ô zabytkowych zwōnach w Radzijowa, starszych ôd „Zigusia”, co jo sie na ich huśtoł za łebka.
Dalszŏ tajla artykułu niżyj
Sam możecie se ôbejrzeć film ks. Tondery ô zwōnach:
