Niy ma nadzieje dlo ludzkości, 4.08.2019
- ôrchideje retujōm życie
- nowe auto
- jak sie rodzōm niykerzi ludzie
Nathalie Birli, austryjacko profesjōnalno kolarka, jechała na kole we Kumbergu we Austryji, jak naroz trzasło w nia auto. Szofer wyszoł z auta i sproł ja kijym, aż była bez siebie, i wciepnōł ja na zadni zic. Jak prziszła do siebie, to leżała swiōnzano i nago u niego w dōma. Chop bōł połny niynawiści i ściykły, kozoł jij pić wino i sznaps, i rychtowoł wana, żeby ja w nij utopić.
Wtynczos ôna dała pozōr, iże we chałpie je połno ôrchideji, i pochwolyła, jake ône piykne. Chop naroz zrobiōł sie miyły, pedzioł jij, że ôn je ôgrodnik, a potym wziōn ôpowiadać, jake mo złe i ciynżke życie. Ôna tōż go wysuchała i pedziała mu, żeby sie umōwić, że to wszyjsko bōł wypadek. Chop sie zgodziōł i zawiōz ja do dōm. Jeji koło ze zamōntowanym GPS-ym ôstało u chopa w dōma. Dugo policyjo go niy musiała szukać.
Ciynżko pedzieć, czy to je historyjo bez nadzieje, abo ze nadziejōm, ale Natalie wiynszujymy wszyjskigo dobrego.
Zdrzōdło: Stuff.co.nz
Dalszŏ tajla artykułu niżyj
Chop we Adelaide we Australiji bōł ôbskarżōny, iże porwoł auto, i musioł stanōńć przed sōndym. Przijechoł inkszym autym, ôstawiōł je na parkingu i poszoł na termin. W tym czasie szandarzi dali pozōr na te auto, bo zdowało im sie podobne do auta, co je mieli we bazie. Pokozało sie, że chop na termin ô porwanie auta przijechoł inkszym porwanym autym.
No przeca potrzebowoł auta, bo policyjo mu wziōnła poprzednie.
Zdrzōdło: ABC
Na Cyprze je prawosławny biskup, co kożdy tydziyń musi pedzieć coś ciekawego. Niydowno stwierdziōł, że kobiyty w ciōnży niy powinny mieć seksu „niynaturalnego” (znaczy analnego), bo ta potrzeba przechodzi wtynczos na niynarodzōne dziecko. Jymu sie rozchodzi ô to, że bydōm sie rodzić geje. Jak sie rodzōm lesbijki, to niy pedzioł.
Po prowdzie niy ma co sie dziwić, że tacy ludzie tyla myślōm i godajōm ô seksie analnym. Przeca ôni fakty bierōm z rzici.
Zdrzōdło: Cyprus Mail
Foto na wiyrchu: greenzowie / Flickr
