Niy ma nadzieje dlŏ ludzkości, 3.06.2018
- mp3 na ebola
- smrōd we fligrze
- stracōne koty
We Kaliforniji dŏchtōr lyczōł bez internet. Ebola. Welami źwiynkowymi. Znaczy przedŏwoł bez swojã strōnã internetowõ hōmeopatyczne zbiory mp3 ze źwiynkami i padoł, iże ône lyczōm Ebola, SARS, świńskõ grypã, malariã, tyfus i kolerã.
Rada medycznŏ Kalifornije napisała skargã do stanu, kaj ôbskarżyła go ô rażōnce zaniydbania i wniosła ô przesuchanie, co na nim by było uzdano, czy zabrać abo zawiesić mu licyncyjõ. Dŏchtōr we wywiadzie dlŏ Los Angeles Times pedzioł, iże niy bydzie dyskutowoł ze ôbskarżyniami, bo za wiela by to kosztowało, a ôkrōm tego „Po prŏwdzie myślã, iże tak czy tak by my przegrali”.
No aby je szczyry.
Zdrzōdło: Ars Technica
Dalszŏ tajla artykułu niżyj
Normalnie fligry lōndujōm awaryjnie skuli problymōw technicznych abo medycznych. Ale niy tyn. Lot Liniji Transavia ze Holandyje na Wyspy Kanaryjske lōndowoł awaryjnie we Portugaliji skirz smrodu, co wyłaziōł z jednego z pasażerōw. Chopa czuć pōnoć było tak fest, iże persōnel prōbowoł go zawrzić we abtrycie, ale i to niy pōmogło. Ludzie wziōnli mdleć i swrŏcać, tōż fliger lōndowoł we Fargo we Portugaliji.
Co ci ludzie tacy delikatni? Mogli by sie rŏz przejechać KZK GOP w czasie hicy.
Zdrzōdło: Fox News
Eifel Zoo kole Lünebach we Rajnlandzie zaczło wielkõ akcyjõ szukaniŏ zwiyrzōnt, co pouciykały ze klŏtek w czasie burzy i zalōniŏ w piōntek wczas rano. Dwa lwy, dwa tigry, niedźwiydź i jaguar sie im straciyły. Pŏrã godzin niyskorzij podanŏ była informacyjŏ iże wszyjske zwiyrzynta podarziło sie chycić nazŏd. Ale niy pedziano jednego. Zwiyrzynta ani niy wyszły ze swojich klŏtek, ino poskrywały sie przed burzōm i deszczym. Ino niedźwiydź wyszoł na alejã, bo wodã podmyła i ôbalyła pot z jego klŏtki.
Zawsze z kotami tak je, pra? Myślymy, iże sie straciyły, a ône siedzōm pod szrankym.
Zdrzōdło: Deutsche Welle
