Niy ma nadzieje dlŏ ludzkości 20.05.2018
- hereszt w sejmie
- fachmanka historyje
- sztrofa za lymōniadã
Wszyjscy już chyba wiymy ô tym, iże we Sejmie we Warszawie durch trwŏ protest ôjcōw ôd niypołnosprawnych dzieci. Wiymy, iże ôni terŏz majōm zakŏz szparyrōw i muszōm durch siedzieć we postrzodku. Wiymy tyż, jak wyglōndŏ Marek Plura, europoseł z wojewōdztwa ślōnskigo, co sōm je niypołnosprawny. My wiymy. Wacha Marszałkowskŏ niy wiy, chociŏż zdŏwało by sie, iże znać takich ludzi to je czyńść jeji roboty. Plura przijechoł do Sejmu trefić sie ze protestujōncymi, a jak wyjyżdżoł z niego, to wachtyrz kŏzoł mu wrōcić, bo myśloł, iże ôn tyż protestuje. Krystyna Szumilas zarŏz pedziała wachtyrzowi, fto ôn je, ale przeprosin niy było. Widać wachtyrze we sejmie sōm ôstatnio tak samo kōmpetyntni jak kerowcy BOR.
Zdrzōdło: wp.pl
Protestujących w #Sejm traktuje się niemal jak w kryminale. Jestem świadkiem. Magda (na zdj.) chciała wyjść na spacer. Strażnik jej nie pozwolił mówiąc, że dzisiejszy spacer już był. Mnie także zaliczono do #ProtestNiepelnosprawnych i kazano mi natychmiast wracać do środka! pic.twitter.com/RmRkIx3OJO
— Marek Plura (@marekplura) May 18, 2018
Megan Fox, znanŏ z „Transformers” i złych wyborōw ôperacyji plastycznych, na kanale Travel Channel prowadzi nowy program Mysteries and Myths with Megan Fox (Zŏgŏdki i Mity z Megan Fox). Podle nij dziynki tymu, iże ôna niy mŏ kariery akadymickij, tyn program bydzie pokazować cołkõ prŏwdã, a niy ino czyńść, bo ôna niy boji sie zdyskredytowaniŏ ôd inkszych naukowcōw. Padŏ tyż, iże srogŏ tajla historyje trzeba jeszcze rŏz przeanalizować. Dobrze, iże tyn program leci ino we Ameryce, bo nōm już styknie gupoty na naszym placu.
Dalszŏ tajla artykułu niżyj
Zdrzōdło: Science Alert
We Lōndynie we ôstatni weekynd bōł festiwal muzyczny Lovebox Festival. Na drōdze, kaj przechodziyły tysiōnce ludzi, małŏ dziouszka postawiyła stolik, a na nim przedŏwała lymōniadã po 50 pynsōw. Po jakimś czasie do stolika podeszło sztworo szandarōw, co pedzieli jij i jeji ôjcu, iże niy majōm licyncyje na przedej i wypisali sztrofã na 150 funtōw. Dziouszka sie popłakała, rada dzielnice strofã cŏfła i przeprosiyła, bo pōnoć szandarzi niy byli racjōnalni. Z drugij strōny jakby z tyj lymōniady wielaś ôsōb trefiyło do lazarytu, to tyż by była gŏdka, że nic sie niy stało.
Zdrzōdło: BBC
