Niy ma nadzieje dlŏ ludzkości, 15.04.2018
- ôżarty w gōrach
- zjedzōne ziele
- niyszczyńśliwy cufal
We italijańskich Alpach chop z Estōnije poszoł do szynku. Popiōł pŏrã szklōnek i uzdoł sie wrŏcać do hotelu. Pokŏzało sie, iże wypiōł wiyncyj niż myśloł, bo tak sie ôpiōł, iże niy spōmiarkowoł, że źle skryńciōł i zamiast do hotelu zaczōn iś w gōrã gōry. Na wysokości 2400 metrōw naszoł zawartõ restauracyjõ, tōż jakoś sie dostoł do postrzodka, poszoł spać na ławkã i tak go znŏdli pracownicy, co prziszli rano do roboty. Szandarzi pedzieli, że za ôpitõ eskapadã dostanie sztrŏfã, ale ô nic niy bydzie ôbskarżōny. Rozmajte rzeczy idzie zrobić na fleku, ale spiōńć sie na gōra bez cufal to mie sie jeszcze niy trefiyło.
Zdrzōdło: News.com.au
We Argyntynie na kōmisariacie policyje we mieście Pilar, była kludzōno inszpekcyjŏ. Pokŏzało sie, iże ze zapisanych 6 tōn marihuany we magazynie ôstało ino kole 5 i pōł tōny. Kōmisŏrza i ôdpowiedzialnych z nim policyjantōw sōnd pytoł, czymu brakuje pōł tōny zielōnyj rośliny, a ci ôdpedzieli, iże to myszy zjadły. Fachmaniŏ z Uniwersytetu w Buenos Aires pedzieli ale, iże myszōm marichuana z jŏdłym by sie niy pōmylyła, a nawet jak, to we magazynie by było połno mŏrtwych myszy. Ôdpowiedzialni byli wyciepniyńci z roboty. Niyzłŏ sztrŏfa za porwanie 2,5 milijōna dolarōw wert narkotykōw.
Zdrzōdło: The Guardian
Dalszŏ tajla artykułu niżyj
Chop z Florydy mioł wypadek 5 kwietnia i pedzioł szandarowi, iże udowodni, że ôn je niywinny niczego, bo ftoś wymusiōł przed nim piyrsze prawo i ôn skuli tego strzaskoł auto. Dowōd to miało być nagranie z kamery autowyj, co jã mioł zamōntowanõ. Jak na policyji wejzdrzeli na nagranie, to ôbejzdrzeli niy ino wypadek, ale tyż jak tyn chop przōdzij włamuje sie do salōnu piykności. Trefiōł do heresztu. No ale aby pokŏzoł, iże wypadek niy bōł z jego winy.
Zdrzōdło: Fox News
