Na gōrnoślōnskich szportplacach, 15.04.2018
Napoczły sie finały hokeja na lodzie ô majstra ligi czeskej, a tam ślōnski manszaft z Trzińca, to nojprzōd ô tym.
Za nami piyrsze dwa szpile miyndzy HC Oceláři Trziniec a Kometa Brno. Manszaft ze stolicy Moraw brōni tytułu majstra, ale to Trziniec bōł wyżyj we tabuli i w razie 7 szpilōw tyn ôstatni bandzie grać u siã.
Piyrszy szpil HC Oceláři Trziniec wygrało suwerynnie 5-1 (2-1, 1-0, 2-0).
Drugi szpil bōł barzyj wyrōwnany i wygroł go manszaft z Brna 2-3 (0-1, 1-1, 1-1). Tera dwa szpile na Morawach (18.04. i 19.04.).
A co we fusbalu? We polskej I lidze napoczły sie szpile ô majstra i utrzimanie. W tej piyrszej skupinie zaskoczōł Gōrnik Zŏbrze, kery wygroł 2-1 we Biołymstoku ze Jagiellōniōm. Jak sie strzylŏ tory przimnioł sie Igor Angulo i szafnōn jy dwa (80 i 84 minuta). Hōnorowego tora dlŏ Jagiellōni strzelōł we 87 minucie Karol Świderski.
Gōrnik je 5.
We skupinie ô utrzimanie Piast Gliwice przegroł we Krakowie ze Cracoviōm 2-1. Tory dlŏ Cracovii strzelili Dimun Milan (43 minuta) i Krzysztof Piątek (65 minuta). Dlŏ Piasta tora strzelōł Sasa Zivec we 59 minucie.
Piast je 13.
We I lidze czeskej dalyj ciśnie Banik Ôstrawa i kōńcu nie je ôstatni, za to kōmplikuje sie sytuacja MFK Karwina.
Dalszŏ tajla artykułu niżyj
Banik Ôstrawa wygroł ze Bohemians Praga 1905 2-0. Tory dlŏ Banika strzelili Jiří Fleišman we 52 minucie i Lukáš Pazdera we 56 minucie.
Niestety we Pradze ze Slaviōm przegrała MFK Karwina 3-2. Karwina prowadziyła po strzale Jana Kalbiski ze 14 minuty. Potym 3 tory jednak strzelōła Slavia i w 87 minucie Tomáš Wágner mōg yno zmniejszyć niekorzystny wynik.
MFK Karwina je 11, a Banik 15, ale traci do Karwiny już yno 3 punkty.
We drugej polskej lidze bez rewelacji, ale Ruch Chorzōw nie je już ôstatni.
GKS Katowice – Stal Mielec 0-2
Ôlimpia Grudziōndz – GKS Tychy 0-1
Ôdra Ôpole – Wigry Suwaki 0-0
Gōrnik Łynczna – Ruch Chorzōw 0-0
Pogōń Siedlce – Podbeskidzie Biylsko-Biołŏ 0-0
GKS Katowice je 7, Ôdra Ôpole 8, Biylsko-Biołŏ 10, GKS Tychy 11, a Ruch Chorzōw 17.
We drugej lidze czeskej tyż manszafty ze Ślōnska szafły mało punktōw, ale Slezky Ôpawa dalyj na piyrszym placu.
Slezky Ôpawa – Fotbal Trziniec 1-1
MFK Frydek-Mistek – Czeske Budziejowice 1-2
Slezky Ôpawa je 1, Trziniec 5, a Frydek-Mistek 14.
Foto na wiyrchu: Anna Długosz
