Niy ma nadzieje dlŏ ludzkości, 1.07.2018
- bakłażan w rzici
- kamera pod keckōm
- pulŏk z kosmosu
Co byście zrobiyli, jakbyście bez dwa dni niy mogli na haźlu zrobić tego, co sie robi na haźlu, a do tego bolołby Wŏs brzuch? Pewnikym byście nawiydziyli dŏchtora. Ale chop w Chinach mioł lepszy knif. Wraziōł sie w zadek 30-cyntymetrowõ ôberżynã. Problym w tym, iże potym niy wiedzioł sie rady jij nazŏd wyciōngnōńć. Bez nastympne dwa dni było mu słabo i durch rzigoł, tōż w kōńcu poszoł do lazarytu. Po przeświytlyniu dŏchtorowie uzdali, iże chopa trza ôtworzić, bo ôberżyna była tak głymboko, iże cisła mu puca.
Na szczyńście wszyjsko poszło dobrze i chop bydzie zdrowy, ale tak po prŏwdzie my mōmy wierzyć, iże ôn sie tã ôberżynã wraziōł, bo go brzuch boloł, ja? Jaaasne.
Zdrzōdło: The Irish Post
Amerykany durch majōm nojlepsze pōmysły. Chop we Madison w Wisconsin kupiōł sie kamerã do strzewika, coby filmować, co dziouchy majōm pod keckami. Niy poradziōł sfilmować ani jednych batek, jak bateryjŏ eksplodowała i pocharatała mu nogã. Poszoł tōż na policyjõ prziznać sie i dać sie heresztować, ale szandarzi ino go pouczyli, bo przecã tak naprŏwdã jak nic niy sfilmowoł, to nic niy zrobiōł. Rzecznik policyje padŏ, iże niy wiedzōm, czymu chop chcioł być heresztowany.
Dalszŏ tajla artykułu niżyj
Widać karma istnieje.
Zdrzōdło: APNews
Internet ôd pŏru dni sie chichrŏ ze ôdkrytyj niydŏwno satelitarnyj fotografije dna wyschniyntego jeziora. Tōż na postrzodku widać coś, co idzie nazwać dwōma słowami: srogi pulŏk. Pōnoć ludzie, co miyszkajōm naôbkoło wiedzieli ô tym dziele ôd pŏru miesiyncy, ale żŏdyn do dzisiej sie niy prziznoł do autorstwa. Jak myślicie, iże to ino Photoshop, to sie wejzdrzijcie na Mapy Google.
Co ciekawe, to niyma ani piyrszy, ani nojsrogszy pulŏk we Australiji, co go widać z kosmosu. We 1998 roku pilot helikoptera dozdrzoł gigantyczny ôbrŏz gołego chopa kōmpletnego ze wosami i wszyjskim inkszym. Chop je 4200 metrōw wysoki, inkszych wymiarōw niy znōmy.
Na Google Maps nowy pulŏk je ôznaczōny „Aussie wiener”, co znaczy – zgŏdli żeście – australijskŏ winerka.
Zdrzōdło: Science Alert
