Mysłowice: Podmiyniōł flaszki w sklepie, może dostać 8 lŏt

Mysłowscy szandarzi chyciyli 36 lŏt starego chopa, co skuli niyuwŏgi ôd ekspediyntki porwoł paczkã cygaryt i umiyniōł flaszkã gorzoły na flaszkã prziniesiōnõ ze sobōm do sklepu. Mysłowiczōn noc przepyńdziōł w policyjnym hereszcie, a na nastympny dziyń usłyszoł ôbskarżynia. Za ôszustwo grozi mu terŏz do 8 lŏt heresztu, a za porwanie grziwna.

W pyńdziałek, 28 stycznia, policyjōny ôstali zawołani do jednego ze sklepōw we Wesołyj. Na placu mōndurowi ôbsztalowali, iże niyznōmy ekspediyntce chop mioł podmiynić flaszkã gorzoły, co pōnoć chcioł kupić, na prziniesiōnõ ze sobōm i skrŏd paczkã cygaryt. Wszyjsko ôdbyło sie barzo wartko i z zaplanowanōm akuratnościōm. 36 lŏt stary mysłowiczōn poprosiōł nojprzōd ô flaszkã gorzoły, a potym ô pŏrã paczek cygaryt.

W mōmyncie kedy przedŏwaczka siōngała po cygaryty, chop podmiyniōł flaszki na ladzie. Poprosiōł tyż kobiytã ô sprawdzynie cyny wina i wtynczŏs z lady wziōn paczkã cygaryt. Po chwili prawiōł, iże zapōmnioł portmanyja i za mōmynt wrōci zapłacić za ôstawiōny na ladzie tŏwŏr. Jak niy wrōciōł, przedŏwaczka zaczła podyjzdrzywać, iże mōg coś porwać. Przezdrzała mōnitoring, co to potwierdziōł.

Policyjōny po ôbejzdrzyniu nagrań z kamery sklepowyj niy mieli problymu z ôbsztalowaniym tożsamości machlyrza. Trefiyli go w dōma. W mōmyncie chycyniŏ mioł 1,45 prōmila alkoholu w ôrganiźmie. Noc przepyndziōł w policyjnym hereszcie, a na nastympny dziyń usłyszoł ôbskarżynie ôszustwa za co grozi mu do 8 lŏt heresztu, a za porwanie grziwna.

Dalszŏ tajla artykułu niżyj

Zdrzōdło: KMP Mysłowice