Klamotologijŏ. Jako to se ulekszyć życi?
Dycki przałach prawidle Czym mynij mōm, tym mi sie żyje bardzij po leku. Je wiyncyj geltu w bojtliku, mynij je bajzlu, nie trza yny sztyjc ukłŏdać, schraniać i przestawiać, ubezpieczać, starać sie ô co… Człowiek je spokojniejszy i szczynśliwszy!
No ale jako ôdklamorzić chałpa, jak już sie tego wszyskigo nazbiyrało za tela lot? I na co se dać pozōr? Knify sōm roztōmajte.
1. Coś sie popsowało?
Nie kukej tego do szranczka – naprŏw to, wyciep, abo zasmycz do skupu sprzyntów. Myśla, że – tak jak jo – ty też niy mŏsz w szuflŏdach cwergów-złotych rōnczek, co to bez noc naprawiōm połŏmany paryzŏl, przyńdziōno byrna abo skiebziōny mikser. Raus na hasiŏk!
2. Lōnty
Wejrzij do szranku i wysztudyruj, czy niy idzie przekŏzać jakich lōntów na zbiōrka. Jak nie pamiyntŏsz, kiedy ôstatni rŏz eś deptoł w ôblyczu, to ciś z tym, możno jeszcze kōmu inkszymu sie sprzidajōm.
Dalszŏ tajla artykułu niżyj
3. Ksiōnżki
Ôddej do bibliŏtyki, wystŏw za darmo, abo sprzedej na internetach. Ta sama rzecz – jak sie nie przidŏwajōm, to po co majōm klamorzić? Niech idōm dalij w świat!
4. Co mogesz wyciepać ajnc mig?
- Przeterminowane mazidła, jŏdło, lyki.
- Durnostojki, zbiyracze kurzu, stare berki i graczki, co mŏsz je ôd bajtla, na kiere żŏdyn już nie umi zaglōndać.
- Stare hefciki, kańtyczki, przedŏwniōne paragōny, kalyndŏrze z łōńskich lŏt. Ku tymu idōm stare cajtōngi, ulotki, gazetki promocyjne z biedrōnki. Żyń na skup makulatury!
- Szkryflŏki, kiere już nie piszōm, połōmane bōnsztifty.
- Kable i folowarki do sprzyntów, kierych już ani niy mŏsz w dōma.
- Stare tisztuchy, forhangi – możno przidajōm sie jakij koleżance-szwŏczce.
5. Nō i ważnŏ rzecz – czego kupować jak nojmynij?
Lōnty – mōmy już tego tela we świecie, że roztōmajte sztofy i targańce zrobiyły sie jednym z nojbardzij niyherskich rzeczy do środowiska. Wysztaunujmy se w gowie, czy nastympnŏ nowŏ jakla w tym miesiōncu je rychtyk takŏ przidajnŏ?
Kolorowe, designerski ôrganizery, kalyndŏrz od kōminiŏrza, Pawlikowskij, Chodakowskij nō i może eszcze z National Geographic, gryfne hefty, szykowne planery… Rychtyk tego używŏsz, abo kupujesz, bo sōm taki cacane?
Klamoty do kuchnie – nie dej sie prōmocjōm w Lidlu! Zestŏw szpatułek do gładzynio lukru na ziście, abo szpecjalnŏ łeżka yny do szałotu? Miarkuj, czy jakiś klamot RYCHTYK ci sie sprzido, czy sie rozchodzi ô to, że praje je łacny, nō i „znajomi mieli we kuchni i tak piyknie to wyglōndało…”. Abo taki zerwis kuchynny – czynsto mŏsz dōma fest na kilkanŏście ludzi? Jak niy, to po co trzimać tela klamotów po byfyjach? W razie czego dycki idzie pożyczać i zbyte.
Mi sie naprŏwda robi leko na duchu, jak wlazuja do moi kuchnie – żŏdnych haszpli na byfyju, a co mi trza, to mieści sie gynau do szranczku. I wcale niy mōm epnych mebli kuchynnych!
Ôkrōm mój mały knif – szpecjalny gŏrnek do warzyniŏ na parze idzie leko zastōmpić ganc ajnfachowym gŏrkiym i cedzitkiym. Serio! Ôboczysz, bydziesz mieć wiyncyj miejsca dōma i własne kōnty nie bydōm cie mierzić. W krōmie mało kiery sie zŏcnie czuje!
Niych sie dobrze żyje – klamoty raus!
Małgorzata. Ślōnskŏ rajzowiczka spod Wodzisławia, frelka wrazidlatŏ i dociyrnŏ. Durch w gangu, rajzuje, furgŏ na paralotni, sztyjc kajś lŏce i pochŏ wiela wlezie. Przaje ślōnskij gŏdce, autōrka tekstów na Wachtyrz.eu i Inkszo.pl.