Jeszcze bez drugie 100 lŏt bydymy sie hajać co to rechtownie sam było?
Napoczła sie propaganda upamiyntniajōncŏ 100 lŏt “powstania śląskiego” we Myslowic – koncerty a fajery, we Katowic bydzie defilada. Nazwozili tu tyla wojokōw, giwerōw, fligrōw, pancrōw itd. Tak jak miałaby tu zaś być jakŏś srogo haja. Zaś bydōm łazić, asić sie a we tym propaganda sioć. Wiela ze tych personōw, kerzy przylezōm na te ôbchody tak rechtownie wie ô tym cajcie, co sam na Gōrnym Ślōnsku sie dziŏło. Niy poradza tak szrajbnōńć, beztōż bych wolŏł pedzieć – “powstanie śląskie” jeszcze bez drugie 100 lŏt tu na Gōrnym Ślōnsku bydymy sie chyba hajać co to rechtownie sam było, tu sam na końcu Gōrnygo Ślōnska co sie wydarzyło, nale gŏdŏ sie propagandowo powstanie na “ŚLĄSKU”, a tyn nasz Ślōnsk je tak ôd Myslowic aż pod Goerlitz a może i dalij.
Eli ftoś był we tym à la “powstaniu” zy Breslau -(Wrocław) zy stolicy Slōnska, abo zy Legnitz-(Legnica), chociŏż ze Sosnowca, Dąbrowy Górniczej, ze cołki Polski tam byli. To takŏ małŏ sprzeczność, bo jak już to “powstanie na Gōrnym Śląsku”.
“Powstanie” – dzisiŏj rostomajcie godajōm na takie coś – zamach stanu, jedni, że to terroryści, inksi, że to “zielone ludki”, a sam, że to tzw. I i II “powstanie” było tak rechtowne a wyrwane ze Herca – zy Serca Ślōnzakōw.
To pojakymu te Ślōnzŏki we plebistycie zawelowali we 60 %, że niy chcōm do tygo zocnygo państwa należeć – do Polski. Skuli tygo trza było niy uszanować woli Ślōnzŏkōw a zrobic zaś haja, tzw. III powstanie. Co kryje sie pod tym wortym “powstanie”? Corŏz wiyncyj Ślōnzŏkōw a środowisk – ferajnōw gŏdŏ, że to żŏdne “powstanie”. Mie sie zdŏ – że tak te I a II bych mianowŏł “polskie powstanie na Śląsku”, co do III to bych pedziol: “wojna domowŏ”. Jak zŏcnie sie gŏdŏ ô “powstańcach śląskich”, jak to wszyjscy byli we tym powstaniu; nawet we naszych familjach gŏdŏ sie, że starzik był powstańcym. Eli ftoś słyszŏł, że sie gŏdŏ: “mōj starzik był selbszucym”? We plebistcie welowało ponad 1,2 miliona personōw, co kaś na tym Gōrnym Ślōnsku plebiscytowym miyszkało ponad 2 miliony. We 1921, we “powstaniu śląskim” – “wojnie domowyj” po jydnyj a drugij zajcie było kaś po 20 tauzenōw Ślōnzŏkōw, tak rechtownie ino po 2% tych co byli welować. 2 % tych Ślōnzkōw, kerzy mieli gewery a poszli sie bić ô Polska je ino dzisiŏj heldami-bohaterami, a ci, kerzy byli po drugej zajcie to fto? A ci, kerzy welowali a niy poszli na ta haja to fto to był dlŏ nŏs? Polok? Niymiec? Abo Slōnzŏk?
Dalszŏ tajla artykułu niżyj
Zdŏ mi sie, że trza być Ślōnzŏkiym, autochtonym, człowiekiym stōnd, do tygo, kery znŏ swoja geszichta, żeby tak rechtownie to wszyjsko pochytać, a niy żyć propagandōm.
LP