Inkszo: Jydz grincojg!
Wysztaunuj se, że je tako pila co dowo yny zocne efekty i wydłuży ci żywot. Chciołbyś mieć tako, pra? Mało tego, byłbyś we sztańdzie wybulić moc geltu coby taki medykamynt mieć… A tak rychtyk wiela nie trza, mōmy to wszyjscy na pozorańdziu. Rozchodzi sie o zielōne gymizy! Grincojgi majōm nejwiyncy wartości ôdżywczych ze wszyskich zortōw kaj jakigo jedzynio. Na Uniwersytecie Harvarda wysztudyrowali, że zielynina fest ôbniżo ryzyko roztomajtych przewlykłych niecherskości, z hercszlagiym i udarym mōzgu na czele.
Zielōne gymizy majōm moc zocnych przeciwutlyniaczy, tak pierōńsko ważnych na poziōmie kōmōrkowym czyli ganc podstawowym, nojważniejszym. Grincojgi majōm kupa chlorofilu, kiery zocnie rozprawio sie z kożdōm niecherskōm kōmōrkōm, w tym rakowōm, abo jako to ôstatnio godajōm, kancerogynnōm. Na zicher słyszołeś ô koynzymie Q10, co to procnie spōmogo regyneracyjo kōmōrek ludzkigo ôrganizmu. Tyn koynzym je fest zależny właśnie ôd chlorofilu i światła słōnecznego. Chcesz se dolifrować moc przeciwutlyniaczy? Wsuwej zielōne a wylazuj na światło słōneczne!
Mosz uroz do zielōnych papek ze szkolorskich stołōwek? Poprōbuj jakoś inakszy te grincojgi przemycić do dziynnej diety. Jak rychtujesz se zoft abo ôwocowy miszōng to dociep petersyla abo pora listkōw szałotu. Smażōnka? Yny ze sznytlochym! A klapsznita na szychta niech bydzie z rukolōm. Dōmowej roboty pesto ze sznitbōunów to tyż ganc zocno idyjo coby pocyganić trocha kubki szmakowe. Abo wersyjo na gibko – rozgniyć widełkōm banana a dociep jarmuż, ôd razu to zielōne bydzie lepszy szmakować.
Dalszŏ tajla artykułu niżyj
Ale co je w tym wszyskim fest ważne – gymizy trza jeść z tłuszczami coby sie wszysko dobrze prziswojyło. Beztōż jak se robisz zielōny zoft, dycki dosuj trocha ôrzechōw, ziorek abo dociep awokado. Wiela tego nie trza a je fest różnica w prziswojalności!
Pamiyncesz bojka o Popeye’u? Jak to chop dostowoł siarōnowej siyły ôd szpinaku? To ni ma fulani, zielōne gymizy to je nejzdrowsze jedzyni na naszej planecie!
Małgorzata. Ślōnskŏ rajzowiczka spod Wodzisławia, frelka wrazidlatŏ i dociyrnŏ. Durch w gangu, rajzuje, furgŏ na paralotni, sztyjc kajś lŏce i pochŏ wiela wlezie. Przaje ślōnskij gŏdce, autōrka tekstów na Wachtyrz.eu i Inkszo.pl.