HC Oceláři Trziniec na Spengler Cup 2018
HC Oceláři Trziniec grali latoś we nojstarszym towarzyskim hokejowym pucharze świata – Spengler Cup we Davos.
Jak co roku grało 6 manszaftōw: Team Canada (to sōm kanadyjske hokeisty, co grajōm we europejskich manszaftach), HC Oceláři Trziniec, gospodŏrze HC Davos, Ice Tigers Nürnberg, Metallurg Magnitogorsk (Rusyjŏ), KaIP Koupio (Finlandyjŏ).
Manszaft ze Ślōnska napoczōn dobrze piyrszy szpil ze Metallurgym Magnitogorsk. Po dwōch tercyjach HC Oceláři Trziniec prowadziōł 1-0, ale we ôstatniej manszaft z Rusyje wyrōwnoł i prziszło do „elwrōw’, w kerych lepszy bōł Metallurg.
We drugym szpilu już gładko przegrali 3-1 ze KaIPa Koupio i HC Oceláři Trziniec mioł ôstatni plac we tabuli. Skuli tego musioł grać ćwierćfinał z gospodŏrzōma ze Szwajcaryji – manszaftym HC Davos. Po dwōch tercyjach bōło 1-1. We ôstatniej tora na 2-1 trefiōł HC Davos i manszaft ze Ślōnska ciepnōn sie do ôdrŏbianiŏ stratōw. We kōńcōwce szpilu wycofali tormana, co zemściyło sie we ôstatniej minucie i HC Davos wygrało 3-1.
Dalszŏ tajla artykułu niżyj
Trziniec skōńczōł tyn turniej bez wygranej i może wrŏcać już nazŏd do ligi czeskej, kaj bōły normalne szpile ligowe. Ôkrōm tego, iże HC Oceláři Trziniec nie groł w lidze, to dalyj je tam na piyrszym placu i mŏ 5 punktōw przewŏgi na Mountfield Hradec Kralove, kere grało już 2 szpile wiyncej.
A w Spengler Cup we niedziela pōłfinały: Team Canada – Ice Tigers Nürnberg i KaIPa Koupio – HC Davos. Majstra brōni Team Canada, kery wygroł bez ôstatnie trzi lata.
