Arrows Ôstrawa zajś majstrym!

Baseballŏrze ze Arrows Ôstrawa ôstali zajś majstrym ligi czeskej. We finale wygrali trzi szpile z Eagels Praga i ôbrōniyli majstra z łōńskygo roku. We niedziela we Ôstrawie wygrali 5-2, a cołki finał 3-0! Piyrsze dwa szpile wygrali 6-3 i 10-1.

Liga czeskŏ skōńczōła latoś tak wartko skuli tego, co 7 wrzejśnia napoczynŏ sie Europejski Majsterszaft, kery je tyż eliminacyjōm do Ôlimpijskich szpilōw we Tokio.

Przipōmnijmy: Arrows mŏ swōj szportplac we ślōnskej tajli Ôstrawy, a gynau we Porubie. Manszaft ze ślōnskej Ôstrawy bōł założōny we 1973 roku. Nojpiyrw grali pod mianym Plamen Poruba, a ôd 1997 roku grajōm już jako Arrows Ôstrawa.