Cepeliada i politykerstwo ze fyjderpuszym

 

 

Chyba niy ma nic gorszego jak deptanie po tym, do cego ftoś mo tako srogo zoca!

 

Bergmōniok to prziwilej. Noleży sie kożdymu, kery mynij abo barzij jes pokuplówany ze grubami, aji ze grubskymi ministerstwami, insztytutami, uczelniami i szulami, ale kej dostanie na to akuratny papiōr. Jo zech taki papiōr dostoł i swōj bergmōniok mōm skryty we śranku. Rod go ôblykōm, kej ino idzie i jes mi w niym lepij jak we ancugu abo we ajnfachowym hymdzie. Jako grubski sztudynt, ex-prezes Sztudynckij Naukowyj Ferajny „Gwarek” i „myntalny bergmōn” (cołko Ślōnsko Politechnika zno mie pod mianym „Grubiorz”) cuja wtedy nojwiynkszy sztolc ze mojij gyszichty i teroźnoście.

 

 

Bild 1: Jo na Anabergu we bergmōnioku ze blumami, coby porzykać za Grubski Sztand (19.09.2026).

 

Ôkrōm Barbōrki, akadymijōw abo piwnych karczmōw (trefōw ôd gwarkōw i inkszych grubiorzōw) ida w niym choby na roztōmajte kōnferyncyje. Ôstatnio bōł zech w niym na Anabergu porzykać za mojich kamratōw, za mie i za cołki Grubski Sztand.

Zdarzyło mi sie trocha działać we polityce (skutkōw niy bōło żodnych, ale na take ôsprowki jesce przijdzie cas) i nigdy zech niy kludziōł żodnyj agyndy, poglōndōw i inkszych ônych we bergmōnioku! Niystety niy kożdy to cuje i poradzi stosówać…

 

Mōmy we Jastrzymbiu na Ślōnsku (kejby niy bōło, to dalij jes Ślōnsk) posła, kerzi sztyjc zbiyrajōm chopōw i za kożdym razym cisnōm cołkōm tōm ferajnōm na politycne trefy PiS-u. Ci poseł mianujōm sie Gregor (Grzegorz) Matusiak. Na Ślōnsk przijechali ze Jaworzna i wyszkolyli sie na krakowskij Grubsko-Hutnicyj Akadymiji za grubskigo inżyniera. Duge lata robiyli na grubie „Manifest Lipcowy” (dzisiej Ruch „Zofiówka” Gruby Kamiynnego Wōnglo „Borynia-Zofiówka” ze Jastrzymbskij Wōnglowyj Spōłki A.S.). Zech jes zicher, ize jakiś drancek we bergmōniokowych ônych dostali (niy ino jedyn), tōz majōm recht, coby we tym ôblecyniu sie pokozać. Niy wiym ale, jak te chopy ôd nich. Choby nawet tyz, to godōm tak, ize niy majōm rechtu pokazywać swojich poglōndōw we tym ônym. To poradzi dować ino taki ôbroz, choby kożdy grubiorz i ex-grubiorz mioł być, jak to sie godo, zazartym „PiS-owcym”. Smolyńske miesiyncnice, welōnkowe kampanije i inksze cyrkusy abo haje to jes jejich bina. Żol ino, co to sōm (podug mie) liche szauszpilery.

 

Ci sami poseł Matusiak durch wypōminajōm, ize reskirōnek PO-PSL zawar do 2015 roku mocka grubōw. Prowda, bo tyz zawiyrali, ale… problym w tym, ize te jejich dane sōm fest połōnacōne – kupluje tam gruby zawarte dugo przed casym koalicyje PO-PSL, aji gruby zawarte za PiS-u po 2015 roku. Wciepujōm przi tym roztōmajte bildy, kere erbnyli ôd sztucnyj intyligyncyje, chocioż merytorycnego wertu tyz niy majōm – gynau choby niykere worty i miana grubōw.

 

W siyrpniu we Jastrzymbiu szprygnyli turm ze szachtu #„JAS II”. Bōł to szacht ze skipym ze downyj gruby „Jastrzymbie” (bez duge lata pod mianym „Jas-Mos”). Kej ftoś niy wiy: skip to tako srogo skrzinia we szachcie (przeważnie zamiast typowyj szole dlo bergmōnōw), kerōm wywozi sie urobek z dołu.
Przed ôbalyniym tego betōnioka (wele 73 metrōw wysoki i 7000 tōnōw ciynżki, a na to 50 kilo szpryngsztofu i 1000 cynderōw) prziszła ta jejich ferajna we bergmōniokach – krynciyli rolki, knipsówali bildy i radówali sie tam choby nowo gruba mieli ôtwiyrać! Ja, gynau: godali, ize tak sie „w Polsce” gruby majōm za Tuska. To fest zwiedowno informacyjo, bo ta istno gruba zawarli za PiS-u! Bōł to gynau Zylwester 2022 roku.

 

Pokozoł sie tyz cyrkus po gupij godce na socialach miyndzy posłym Matusiakym a Hannōm Boczek – rybnickōm czōnkiniōm Kōnfederacyje. Tak sie to dalij kulo, ize poradzōm sie trefić we gerychcie. Ani mie to grzeje, ani ziōmbi, tōz dalij tego tymatu niy kludza.
Do tego trza spōmnieć ô smolyńskij miesiyncnicy ze (wrzesiyń 2026 roku) – te wadzynie sie z ludźmi, skokanie, sztuchanie… Gańba i nic wiyncyj!

 

Bez duge lata bergmōniok bōł symbolym gōrnoślōnskij gyszichty i gospodarki, grubskigo fachu, aji ciynżkij roboty. Dzisiej niykerzi robiōm z niego (i w niym) politycny cyrkus. Na to, jako prziszłego inżyniera grubiorza, a do tego synka, wnuka i prawnuka gōrnoślōnskich bergmōnōw, mojij zgody niy ma i niy bydzie! Chyba niy ma nic gorszego jak deptanie po tym, do cego ftoś mo tako srogo zoca!

 

 

Bild 2: Dziekan Grubskigo Wydziału Ślōnskij Politechniki K. Filipowicz bydōm dować mi Grubskigo Technika III Rangi (06.12.2024) – K. Berezowski [1].

 

 

Terozki, po 46. rocznicy solidarnościowego sztrajku na gōrnoślōnskich grubach (w tym przede wszyjskym jastrzymbskich) i na chwila przed 45. rocznicōm pacyfikacyje katowskij gruby „Ohajm” („Oheim” / „Wujek”), kero zawarli 1 kwietnia tego roku, trza mi to pedzieć ôfyn, publicnie. Tako cepeliada i politykerstwo ze fyjderpuszym grubskym strzodowiskōm ino szkodzōm, a te strzodowiska zōu wi zōu majōm „same ze sobōm do cyniynio!”, jak godali moja niyboscka ōma.

 

Wojciech K. Janik

 

Bibliografijo:
[1] https://nettg.pl/potrzebujemy-nowego-spojrzenia-na-gornictwo
[2] https://www.radio90.pl/runela-wieza-wyciagowa-szybu-jas-ii-w-jastrzebiu-zdroju-dzis-wysadzono-ja-w-powietrze-zdjecia.html#gsc.tab=0
[3] https://www.tujastrzebie.pl/wiadomosci,wpis-hanny-boczek-wywolal-burze-grzegorz-matusiak-spotkamy-sie-na-wokandzie,wia5-3266-29634.html
[4] https://www.fakt.pl/polityka/antoni-macierewicz-i-grzegorz-matusiak-zostana-zgloszeni-na-policje-po-miesiecznicy/jkvzp9d
[5] https://sip.lex.pl/akty-prawne/dzu-dziennik-ustaw/stopnie-gornicze-honorowe-szpady-gornicze-i-mundury-gornicze-17018467/art-11