A ôn ci pado – PO!
Grzegorz Kulik przejechoł sie we swojim tekście “Mao nie zagłosowałem na Wiosnę” po kōmitetach, co bydōm sztartować w europejskim welōnku. Pokozało mu sie, że na żodyn niy idzie dać głosu… Żodyn krōm Platformy Ôbywatelskij (abo, wierza, Koalicyje Europejskij, przi kieryj Platforma terozki je). Chocioż – pado – mioł już na nia żodyn roz niy welować.
Zdo sie ale, co prziszeł ku tymu ino skuli tego, co niy wejrzoł na nia tak, jak zaglōndoł na drugie partyje: bez dokōnania, partyjne kōmunikaty, abo ôsoby, co sztartujōm na wykozach.
Tōż wezna i dopisza tyn kōnsek, kierego chybio we ôryginalnym tekście. Mōm nadzieja, iże Grzegorz sie na mie za to niy pogorszy.
***
Dalszŏ tajla artykułu niżyj
Miołbych dać krziżyk przi Platformie, kiero wraziyła do zamarznika ôbywatelski projekt ustawy, co przidowała Ślōnzokōw na wykoz etnicznych myńszości? A przeca to niy bōł ino tyn jedyn roz za ôsiym lot regiyrowanio, jak inicjatywy do ślōnskij godki abo etniczności były ôdciepowane, przeciepowane abo ôsmolōne.
W kieryj za człowieka ôd dyskōntowanio ślōnskich sympatyjōw robi europoseł Marek Plura? Tyn, co chce robić za ślōnskigo papieża we sużbie u “Pónbóczka”, z prawym do “exkomunikowanio” ze świyntyj, ślōnskij nacyje tych, co sie dziwajōm na świat inacyj jak ôn?
Kiero… Ani sie niy cisna tam, kaj już Poloki robiōm za tela larma: miyndzy ôśmiorniczki a piniōndze z OFE, miyndzy ôroz fajnego Giertycha a zawdy ciekawo Kopacz ôd dinozaurōw.
Niy wierza Grzegorzowi, jak mi pado, co Platforma to je jedyno – abo jakoś – alternatywa. Po prowdzie zdo mi sie, co idzie miyndzy kōmitetami znojś takie, co majōm mynij grzechōw do ôbywatelskigo społeczyństwa jak ôna.
Niy ma partyje idealnyj. Przi welōnku zaś bydzie trza sie szkryfnōńć przi tyj, ôd kieryj nojmynij mi sie dźwigo.
