Ôstrawa: Banik – Celtic na stolecie

Banik Ôstrawa fajeruje latoś 100 lŏt swojego ferajnu. We wrzejśniu planowany je srogi fest z kōncertōma na Zōmku Ślōnskoôstrawskim (9-10.09), ale jutro (13 lipca) bydzie nojważniejszy pōnkt sportowy tego fajeru: szpil Baniku Ôstrawa ze Celtikym Glasgow. Szpil napocznie sie ô szōstyj na wieczōr na Stadiōnie Miejskim we Ôsrawie-Witkowicach.

Idzie jeszcze ôbsztalować bilety, a kożdy fto przidzie na szpil dostanie pamiōntkowy szal.

Przipōmnijmy: Celtic Glasgow ôstoł już 51. razy majstrym Szkocyje! Banik Ôstrawa ôstoł założony 100 lŏt do zadku we ślōnskij tajle Ôstrawy, jako SK Slezská Ostrava (Sportovní klub Slezská Ostrava) i do dzisiej sie chlubi tym, iże je ślōnskim manszaftym. We 1945 przemiyniyli mu miano na SK Ostrawa, a ôd 1952 mianuje sie Banik (po naszymu Grubiŏrz). Banik Ôstrawa bōł 3. razy majstrym Czechosłowacyje i rŏz majstrym Czech.