7 platformōw, kierych niy bydzie na Marszu Autōnōmije (ale zōwizō przidź)

Zawdych se marzōł, coby marsze autōnōmije ewoluowały w strōna tych, co Amerykōny majōm na roztōmajte świynta, abo niymieckich, co sōm na miynsopust. Mynij larma i politykierowanio, wiyncyj radości, farbōw, muzyki, uciechy, atrakcyji… Wielkie show: ôrkiestry, mażoretki, poprzeblykani ludzie i… platformy na kōłkach.

Bez mōmynt szło to w ta strōna. Pamiyntōm na kierymś marszu jechać auto z ludziami we ślōnskich szatach na pace. Potym ale było skrōmnij i skrōmnij i skrōmnij… Tōż latoś niy moga żodnymu ôbiecać, że uwidzi moc atrakcyjōw krōm grubskij ôrkiestry. Za to moga wylistować, jakich platformōw – coby je wierza kożdy chcioł uwidzieć – latoś na Marszu Autōnōmije niy bydzie.

1 Miniōnkowo

Miniōnki chodzōm we ślōnskich farbach, a kożdy bajtel mo je rod. Forsztelujecie se to: kupa żōłto-modrych chopkōw pod ślōnskōm fanōm z miniōnkowym ôkiym na plac ôrła?

Dalszŏ tajla artykułu niżyj

2 Wielki złoty ôrzōł

Takie luftbalōny we Stanach idzie se wypożycznōńć na sama impreza. Widzielibyście tego ślōnskigo ôrła furgać miyndzy katowskimi kamiynicami?

Foto z ôferty ôd jednyj z firmōw, co wypożyczajōm takie balōny: fabulousinflatables.com

3 Hanusz II Dobry i strzedniowieczno banda

Widziołech kiejś na MA pora ludzi we strzedniowiecznym ôblyczu – sam ale trza by cołkigo ôrszaku ôd ślōnskigo princa, abo trōnu na kōłkach i party wojokōw, co by nōm princa wachowała.

4 Ślōnskie straszki

Potrzebno by nōm tyż była fōra ze ślōnskimi straszkami: połednicami, utopcami, fojermanami i Skarbnikiym-fōrmanym.

5 Rakieta i ślōnskie astronauty

Ślōnski kosmiczny program, bo trza patrzeć we prziszłość, aże ku gwiozdōm!

6 Silezyjo

Zdała by sie tyż sama Silezyjo z cołkim ôrszakiym – klasyczno personifikacyjo choby ze starych durkōw, ino w modernym wydaniu (prziznōm sie bez bicio: zaglōndōm sam na to, co Rammstein napochoł z Germanijōm w teledysku do “Deutchland”).

7 A la Rio

Trocha połedniowoamerykańskigo karnawału we postrzodku Katowic, pra?

Przeboczcie, żodnych takich atrakcyjōw (zdo sie) niy trefiymy. Ciynżko pedzieć, co nos czeko; wiela tyż przidzie ludzi po tyj pandymicznyj pauzie, z tym rozlecanym ślōnskim ruchym regiōnalnym i przi prōmocyji, co sztartła, jakby niy mōgła: niyskoro i po cichu.

Wszyskim nōm sie przido porzōndne, ślōnskie świynto Gōrnego Ślōnska, takie ôd nos – do nos. Tōż jak ino poradzisz, to przijedź, z kamrat(k)ami, familijōm, abo sōm. Dyć taki ślōnski, familijny, radosny i ôtwarty marsz je potrzebny.