Akcyjo charytatywno: Babsko edukacyjo
Pamiyntocie wierszyk ô Bambo Murzinku? 👶🏿👧🏾🧒🏿👦🏾
„[…] Bambo Murzinek to mōndry synek…
I niy mo w szuli samych jedynek.
Bo sie mōndrości wkłodo do gŏwy
W swyj afrykōńskij szuli ze trŏwy.”
We takij szuli rechtorkōm je tera moja kamratka, Sylwia. Pora tydni tymu wlazła do fligra do Ugandy i pofurgała, coby uczyć bajtle angielskigo – a choby ino!
Drabko, bo jeszcze przed rajzōm, kapła sie, że trza bydzie pōmogać sam niy yno bajtlōm, ale tyż ôd nich mutrōm. Sztyry nachbarki ôd Sylwie majōm fest ciynżko sytuacyjo – chopy je ciepli jak yno zajszły w ciōnża. Dziołchy niy majōm zawodu, roboty, a przi tym blank puste geldbojtle. 😢
Dalszŏ tajla artykułu niżyj
Sylwia szporuje tera piyniōndze, coby posłać je do szule, kaj by poradziyły wybildować sie na frizjerki abo szwŏczki – co by mogły ciś do roboty a zarobić na utrzimanie swoich familiji, a ku tymu dać przikład bajtlōm – coby te miały edukacyjo we zŏcy. 👗💇🏿♀️
Wiyncyj ô tym projekcie we linku. Ôglōndejcie historyje na instagramie @sylwiapalgan. A sam wciepuja link do ściepy, kaj znejdziecie kōnkret info (PL/ENG):
https://zrzutka.pl/jexh6k
Kożdy złotek mŏ znaczynie!
Dziynki!
Fotografijo na wiyrchu: Kobiyty ze samopōmocy we Katwe. Fot. Muzungupeter CC BY-SA 4.0
Kasia Polak (nazwisko mylōnce), frela z Pilchowic, kero trzi lata tymu wrŏz ze swojōm kamratkōm sztartła ze blogiym Your Silesian Friends, kaj ôsprowiała ô rajzowaniu. Sztudyntka kōmunikacyje, mediów a kultury. Nojbarzij przaje poezyji, zielinŏrstwu a ślōnskij gŏdce. Kōntakt: katarzyna.polka.polak [małpica] gmail.com