Ślōnsko tastatura na Android

Ôd strzody, 7 siyrpnia, je dostympno nowo ślōnsko tastatura do maszin ze systymym Android. Projekt Silling, co ôdpowiado za Korpus Ślōnskij Mŏwy i translatōr polsko-ślōnski, ôpublikowoł we Sklepie Google przidowek do AnySoftKeyboard, co dziynki niymu idzie pisać na tabletach i mobilniokach uproszczōnym alfabetym ślabikorzowym.

Tastatura mo funkcyjo podpowiadanio słōw i zno ich kole 57 tysiyncy. AnySoftKeyboard to tyż program ze ôtwartym zdrzōdłym, co ôznaczo, że cołki kod je dostympny do przejzdrzynio, i idzie zweryfikować, co aplikacyjo gynau robi. AnySoftKeyboard niy zbiyro żodnych danych z masziny, ani nikaj nic niy wysyło, tōż może sie spodobać tym, co majōm radzi prywatność.

Link do tastatury na strōnie Silling.