Wirtualno wystawa herbōw – cz. 2
Wirtualno wystawa herbōw skiż trzidziestolecio samorzōndności we III RP. Dzisiej drugi kōnsek.
SANOK
Princ halicki Jerzy tyn Sanok lokowoł
Ze władcami Polski po swojemu zmowioł
Prawym magdeburskim te miasto stanyło
Na Rusi halicki piyrsze take było
Dyć bojary struli drap władce swojego
Drap sztela halicko Kazika Wielgego.
SŁŌMNIKI
Szłōm – swoje miano doł tym Słōmnikōm
Szłōm chrōniōł gowy dyć wojownikōm
Z ajzy klepane zocne helmisko
W niym czasym zdo sie nadzieji wszysko
Kazimierz Wielgi mioł w zocy sztela
Doł prawa miejske – zdo niy za wiela
Kościōł drzewniany wartko podźwigoł
Dboł ô dziedzina, tōż z tym niy migoł.
STRZELIN
Sie przi Oławie szlaki krziżujōm
Kupce z toworym tyndy wandrujōm
Tōż i warownia tu kasztelana
Tako spokojni, czy ciyngym szpana?
Czy ta dziedzina słynie łukami?
Czynsto szło trefić tam ze strzałami?
Dzisioj we herbie, dyć piyrwyj zdowo
Kaj strzała – śmiertka ze kosōm stowo.
BIOŁO PODLASKO
Pyjter Janowicz z przezwiskym „Bioły”
Piyrszym dziedziny ty panym?
Czas mono niy bōł wtedy wesoły
W Ksiynstwie Litewskim doś szpany
Przi Iliniczach jakoś jyj dzioło
Choć wojewōdztwa miyniyły
Wpiyrw trockim wiatrym w dziedzinie wioło
Drap podlaskymu do siyły.
DOLSK
Piyrwyj osada bōła targowo
Biskup gnieźniyński tu panym stowo
Szlak ze Poznanio na Ślōnzek szoł
Tōż Dolsk profity ze tego mioł
Kazimierz Wielgi miastym już zrobiōł
Biskup kościołym zocnym ôzdobiōł
Jeziora Dolske, Wielge i Małe
Fiszōm futrujōm przez wieki całe.
ORNONTOWICE – Renoltowitz
Reinold zasadźcōm richtig ty wsi?
Czy historyjo coś ô tym wiy?
Czamu jo dzisioj tako to słysza?
Fara tu karlus mioł mieć sołtysa!
Tōż we tych czasach na Ślōnsku dzioło
Choć wpiyrw niy bōło wcale wesoło
Kolōnizacjo wielgo ruszyła
Ze Flandrji, Niymiec, Walōńji była
Ludzi nalazło na ziymie puste
By zaś sie mogły stać bardzi tuste.
Bronisław Wątroba