Wirtualno wystawa herbōw – cz. 1
Wirtualno wystawa herbōw skiż trzidziestolecio samorzōndności we III RP. Dzisiej piyrszy kōnsek.
RUDA ŚLŌNSKO
Kaj szukać jōntrzka ty Rudy Ślōnski?
Dyć rozciepane wpiyrw jeji kōnski
Choć wszyske Państwo Bytōmske trzimie
Zdało co ziymia ta dugo drzymie
Ze industryjōm wylazła z ćmoka
Kaj wōngel, ajza – niy trza boroka
Tōż gruby, huty i inksze werki
Wartko bogacōm – niy duperelki
Dalszŏ tajla artykułu niżyj
I Ruda Ślōnsko tako dźwigajōm
Po drugi wojnie już jōm tu majōm
Wiyrek wpiyrw „rynka ôddoł” Fryncicie
A łōna w kōńcu Rudzie – to wiycie.
STRUMIYŃ
Miano ôd strumiynio wziyła prawie sztela
Wojanowi princ doł morgōw tu dość wiela
Dyć czynsto Racibōrz wadziōł sie z Cieszynym
Na granicy leżeć zdowajōm dziedziny
Ô wsi już szkryfnyli we piytnostym wieku
Kej Kornicōw bōła – wiydz ô tym czowieku
W kōńcu princ cieszyński doł jōm Brodeckiymu
Prawa miejske Strumiyń tyż erbnōł przi niymu.
ŁAŃCUT – Landshut
Krōl Kazimierz Wielgi tyn Landshut lokowoł
Władysław Opolczyk we tym reskiyrowoł
Ściōngnōł Bajerokōw – miyszkali w Landshucie
Tōż stōnd twoje miano przezocny Łańcucie
Zamek twōj drzewniany – Tatarōm ôpiyroł
Niyjedyn czambulik w te strōny zaziyroł
Dyć żeś wiela strzimoł – dzisioj historyjōm
Sie asisz – niy darmo sōm na cia zaziyrōm
STRZYŻŌW
Kaj sie Stobnica z Wisłokym zlywo
Grōd stoł już downo – niychej niy dziwo
Iże princ Wiślan podźwigoł tukej
Strzeżno – w tym miana piyrszego szukej
Prziszli Pepiki, prziszli Polany
W kōńcu Bogoriōm tyn grōd bōł dany
Potym Tatary ciyngym go polōm
Dyć je do dzisioj – ludzkōm to wolōm.
ZAWIDŌW
Na Gōrze Michała kościōł postawiyli
Tu ze Archaniołym bliżyj Boga byli
We włościach biskupa tako miśniyńskego
Dyć z korzynio przeca tu echt łużyckiego
Kej wojny husycke jako mōr w tych strōnach
Dziw co ty dziedzinie niy prziszło z tym skōnać
Dziw iże durś dźwigo, mieszczany starajōm
Ze wiarōm w Pōnbōczka ciyngym siyły majōm.
Bronisław Wątroba