Tynisistka ze Ślōnska drugŏ we Australian Open
Petra Kvitová, tynisistka rodzōnŏ we ślōnskim Bilovcu, nie szafła wygranej we finale Australian Open. Choć dlŏ wielu bōła faworytkōm tego szpilu, to we finale przegrała ze Japōnkōm Naomi Osaka 1-2 (6-7, 7-5, 4-6). Szpil bōł fest wyrōwnany. We piyrszym secie trza bōło tie-breaku, kery Japōnka wygrała 7-2. We drugym ôbie tynistki pŏra razy przełōmywały gemy rywalek, a Naomi Osaka wygrywała już 5-3 i miała trzi match-pointy, ale Kvitovŏ to ôdrobiōła i wygrała 7-5. We ôstatnim secie Naomi Osaka udało sie przełōmać jedyn gem i to stykło do wygraniŏ cołkego setu 6-4, a szpilu 2-1.
Petra Kvitová do finału wszystke szpile wygrała do zera. We pōłfinale pokōnała Amerykōnka Danielle Collins 7-6 i 6-0.
A warciyj we 1/4 finału ze Australijkōm Ashleigh Barty (6-1 i 6-4), we 1/8 finału z Amerykankōm Amanda Anisimova, we 1/16 ze Belindōm Bencic ze Szwajcaryje, we 1/32 ze Rumunkōm Irinōm-Cameliōm Begu i we 1/64 ze Magdalénōm Rybárikovōm ze Słowacyje.
Dalszŏ tajla artykułu niżyj
****
Dlŏ przipōmniyniŏ: we deblu kobiyt Květa Peschke, inkszŏ tynistka za ślōnskego Bilovca, we parze ze Nicole Melichar (USA) ôdpadły we 1/8 finału, kaj grały z Amerykōnkōma Alison Riske i Jennifer Brady i przegrały 2-0.
Pryndzyj we 1/32 wygrały z parōm Watson / Maria 2-1 a we piōntek rano we 1/16 finału wygrały parōm Nadija Kiczenok (Ukraina) / Yafan Wang (Chiny) 2-0.
Australian Open to je co roku piyrszy turniyj Grand Slam tynisa.
Foto tytułowe: Pavel Lebeda / Česká sportovní [CC BY-SA 3.0], via Wikimedia Commons
