Szōsto edycjo “Silesia Incognita” już w ta sobota
Eli ftoś mo w doma bajtla-szkolorza, to na zicher wiy, co to je “Silesia Incognita”. Tyn wojewōdzki kōnkurs wiedzy ô Hajmacie rychtujōm kożdego roku Szkoła Podstawowo nr 37 i Muzyjym Miejske we Tychach. A eli ftoś niy wiy,to możno skuli tego, co rechtor jejich bajtla niy mo w zocy Ślōnska i beztōż niy biere udziału? Eli tak je, to sam napiszymy Wom wiyncyj.
Jak to sie tak po prowdzie zaczło?
Siedym lot do zadku Marcin Melon, rechtor i pisorz (nojwiyncyj chyba uwożany za ksiōnżki ô kōmisorzu Hanusiku), prziszōł ku tymu, coby narychtować konkurs do bajtli, kere przajōm Ślōnskowi. Jak som godo, to miōł być konkurs inkszy niż wszyske, taki, kery pokazuje Ślōnsk niy z polskij i niy z niymieckij, ino prawie ze ślōnskij perspektywy. Dzisiej Marcin Melon prziznowo sie, co wtynczos ani niy pomyślōł jak srogo ôkoże sie ta inicjatywa.
Fto za tym stoji?
Wele Melona trza pedzieć ło Aleksandrze Matuszczyk, uwożanyj na cōłkim Ślōnsku dyrektorce tyskigo Muzyjum, dziynki keremu Silesia Incognita mo dzisiej taki szwōng. Trza pedzieć ô Karinie Bryji, dyrektorce Szkoły Podstawowyj nr 37, kaj sie to wszysko napoczło. Niy do sie niy pedzieć ô Łukaszu Kohucie, ślōnskim europośle, kery robi za honorowego patrona “Silesia Incognita”, kożdego roku przijeżdżo na finał i biere nojlepsze bajtle w nagroda do Bruksele (piyrwyj za patrona robiōł Marek Plura). No i ô katowickim Wojewōdzkim Ośrodku Metodycznym, kery ôd samego poczōntku czuwo nad poziomym merytorycznym konkursu.
Jak to było łōńskigo roku?
Wtynczos finał bōł niy (jak zowdy i latoś tyż) na Sztadionie Miejskim we Tychach, ino – skuli pandemie – we Szkole nr 37. Skiż tego samego nagrody fōndła niy Fundacja Tauron, ino ślōnsko firma “Kaj ôn szoł” (www.kajonshow.pl), keryj produkty na zicher zno kożdy Ślōnzok. Nojlepsze okozały sie Ola Morawiec i Ania Musioł, frelki ze szkoły we wsi Przegędza w powiecie rybnickim. Dziouszki, ze swojōm rechtorkōm Joannōm Malec, narychtowały prezentacjo p.t. “Stargane koszule”, dziynki keryj dostały sie do nojlepszyj finałowyj trzidziestki. Tam nojlepij rozpoznowały ślōnsko muzyka (ôd “Dżemu” do “Kata”!), wiedziały nojwiyncyj ô wybitnych Ślōnzoczkach i ôdpedziały na mocka roztomaitych pytań. Terozki sōm już nazod z Brukseli i bez cōłko reszta życia bydōm sie asić tym sukcesym.
Dalszŏ tajla artykułu niżyj
Co bydzie latoś?
Po pandemii finał wraco na Sztadion Miejski w Tychach, a Fundacja Tauron zaś fōndła nagrody. W eliminacjach nojlepsze były frelki z Gogołowyj i karlusy ze Szkoły Podstawowyj nr 25 w Rudzie Ślōnskij, nale dyć to ô niczym niy świadczy, bo doświadczyniy uczy, co we finale wszysko idzie jeszcze przekopyrtnōnć na ôpach. A co bydzie we finale? To na razie wiedzōm ino organizatory i jury, keremu szefować bydzie zaś dochtōr Michał Dziōbek ze Ślōnskigo Cyntrum Wolności i Solidarności. Godajōm ino, co bydōm niyspodzianki, mocka szpasu i sroge emocje. Kożdy, fto zno konkurs “Silesia Incognita”, wiy, co inakszyj niy bydzie!
