Rybnik: pumptrack i racing we Kamiyniu
Nowŏ atrakcyjŏ szportowŏ dlŏ amatorōw ekstrymalnyj jazdy na kole! W Rybniku-Kamiyniu powstoły tory pumptrack jak tyż racing. To nastympnŏ inwestycyjŏ, co poprawi atrakcyjność tyj rybnickij dzielnice.
Pumptrack to ekstra zaprojektowany tor przeszkōd, co się skłŏdŏ z garbōw, winkli profilowanych jak tyż małych „hopek” poskłŏdanych w takim porzōndku, by możliwe było nabiyranie szwōngu i utrzimowanie wartkości bez kōnieczności pyndalowaniŏ. Take ôbiekty cieszōm sie ôgrōmnōm popularnościōm postrzōd dzieci, modych i majoryntnych, aktywnych ludzi. Inkszy ze tyj samyj zorty je na terynie Parku Tymatycznego nad Nacynōm.
Tor pumptrack w Kamyniu mŏ asfaltowõ nawiyrchniã i 44 metry dugości. Szyrokość toru jezdnego to kole 1,5 m. Społym ze beszōngami szyrokość toru – zależnie ôd placu – je miyndzy 1,9 a 2,9 m. Wysokość na winklach mŏ miyndzy 0,6 a 0,8 m.
Zarŏz kole niego je dalszy tor – zorty racing. Sam nawiyrchnia 175 metrōw dugŏ usutŏ je z kruszywa naturalnego. Szyrokość toru je zmiynnŏ, w znŏleżności ôd placu mŏ ôn ôd 4,9 do 6,8 m. Wysokość zniesiyniŏ poczōntkowego to je 2,25 m, a na winklach siōngŏ 1,85 m. Wysokość przewyższyń na „prostkach” (tm. hopek) to miyndzy 1 a 1,3 m.
Dalszŏ tajla artykułu niżyj
Tor przizwŏlŏ na poczucie uciechy z jazdy na kole gōrskim we mieście. Sztreka przeznaczōnŏ je dlŏ kożdyj grupy wiekowyj, ale nawet barzij zaawansowanym kolŏrzōm sie spodobŏ.
– Takŏ infrastruktura kołowŏ na zicher prziczyni sie do zwiynkszyniŏ atrakcyjności ôstrzodka MOSiR w Kamiyniu. Stopniowo wrŏcōmy tyn plac i cołkõ dzielnicã na rekreacyjnõ mapã Rybnika. Świadczōm ô tym już zryalizowane inwestycyje, jak chociŏż Pluskadełko, poskludzanie przestrzyństw naôbkoło hotelu Olimpia abo stworzynie atrakcyji kołowych. Chciołbych rozwijać ôstrzodek w Kamyniu tak, coby kożdy rok ukazowała sie w tym placu nowŏ infrastruktura, keryj elymynta bydōm sie wzajymnie dopołniały i spōmŏgały rozwōj tego miyjsca – prawi prezydynt Rybnika Piotr Kuczera.
Tory sōm na terynie ôstrzodka MOSiR przi ul. Hotelowyj blisko wrōt wjazdowych ôd strōny ul. Jodłowyj. Je to teryn naprzeciwko szpilplacōw tryningowych, nojbarzij ôddalōny ôd głownych wrōt wjazdowych.
