Radlin: Przekludzajōm strōmy

We Radlinie zaniydugo ruszŏ wŏżnŏ inwestycyjŏ – kōmpleksowy rymōnt 1,2 km sztreki na ul. Rymera. W mocka placach zdatne bydzie poszyrzynie pasa drōgowego, kery terŏźnie niyma ani wymiarowy ani zgodliwy z normōma. W pŏru placach ukŏzać sie majōm doimyntnie nowe tretuary.

Bez to miasto uradziōło ô… przekludzyniu modych strōmōw, kere ôstały nasadzone na poboczach pŏrã lŏt nazŏd. Strōmy nasadzono w mōmyncie kej żŏdyn niy planowoł jeszcze rymōntu tej sztreki, niy było ôwdy tyż możebności współfinansowania tyj inwestycyje ze postrzodkōw zewnyntrznych. Bez to w mōmyncie kej zapadła decyzyjŏ ô rymōntach, uradzōno, coby znojść nowõ lokalizacyjõ dlŏ modych strōmōw.

Tajla ôstała już przeflancowanŏ i je na zieleńcu wele Przedszkola Publicznego nr 1 im. Gromadki Misia Uszatka, tyż przi ul. Rymera, jednak w placu, kery je zicher i zielōny. Drugŏ tajla strōmōw znojdzie sie na zielōnych terynach na ul. Reymonta, blank blisko nowyj sztreki kołowyj, kerŏ kupluje Radlin z Wodzisławiem i tamtejszym cyntrum przesiadkowym.

Rymōnt sztreki na ul. Rymera to jedno z nojwŏżniyjszych latosich auftragōw krysu wodzisławskigo i miasta Radlin. Wykōnane ôstanie 1,2 km nowego gysztelu drōgi jak tyż 2 km nowych tretuarōw. Planowane je tyż wykōnanie abo przebudowanie ôdwodniyniŏ drōgi. Imyntnŏ cyna auftragu to kol. 3,5 mln zł, na kerõ skłŏdŏ sie ajnzac krysu, gminy jak tyż dofinancowanie z Funduszu Dróg Samorządowych.

Dalszŏ tajla artykułu niżyj