Pościg we Rogowie i Czyżowicach
Wczorej w rynce policyjōnōw z gorzyckigo kōmisariatu wpŏd 22-latek, co niy zastawiōł sie do kōntrole drōgowyj i uciykoł przed wachtyrzami prawa. Niy dość, iże bōł ôżarty i mioł zakŏz kludzyniŏ wozideł, to do tego bōł poszukowany do ôdbyciŏ kŏry heresztu.
Wczorej kole 23.30 policyjōny z Kōmisariatu Policyje w Gorzycach dozdrzeli na ulicy Raciborskij w Rogowie alfã romeo, co niōm, podle posiadanych informacyji, mōg jechać poszukowany chop. Mōndurowi uzdali go zastawić do kōntrole. Kerowca niy zaryagowoł ale na sygnały do zastawiyniŏ i narŏz przispiyszōł. Przi uciyczce przed szandarami, pŏrã razy naruszoł prawidła ruchu drōgowego. Na rōndzie w Czyżowicach skrynciōł w ulicã Gorzyckõ, a dalij w Piŏskowõ. Na krziżōwce z ulicōm Rybnickōm inkszy patrol zablokowoł mu radiowozym drōgã ucieczki.
22-latek, jak ôbejzdrzoł blokadã, to skrynciōł do posesyje, kaj trzasnōł jeszcze we wrota, jak zastawioł auto. Przeskoczōł wrōta i uciykoł dalij piechty w strōnã Turzy Ślōnskij. Po pŏruset metrach chop bōł chycōny ôd policyjōnōw. Po wyszukaniu go w policyjnych bazach danych pokŏzało sie, iże ôn je poszukowany do ôdbyciŏ kŏry heresztu.
Mōndurowi wybadali tyż ôd niego trzyźwość. W ôrganiźmie pirata drōgowego było hned 1,5 promila alkoholu. Pokŏzało sie tyż, iże kludziōł auto, chociŏż mioł rozsōndzōny ôd gyrichtu zakŏz. Kerowca niy posiadoł ferzicherōngu wozidła i mioł niyaktualne badania techniczne, tōż zastawiōno było mu tyż dowōd registracyjny. 22-latek trefiōł już za krŏty. Jego czas za niymi może sie wydużyć, bo za popołniōne przestympstwo grozi mu nawet do piyńciu lŏt heresztu.
Dalszŏ tajla artykułu niżyj
Zdrzōdło i fotografijo: KPP Wodzisław