Po tragedyji we Boguminie: Czy musieli skokać?

Dowiedzieli my sie ôtok ô wielkij tragedyji, kero stała sie w Czeskij Republice, na czeskim Ślōnsku za Ôdrōm a Ôlzōm we Boguminie, kaj ô życi prziszło bezmała 11 ludzi. Jakiś chłop podpolōł dźwiyrze we pomiyszkaniu na 11 sztoku we familoku. Zgorało przi tymu 6 ludzi, a miyndzy nimi było troje dziecek. Dyć ô życi prziszło tyż 5 ludzi, co miyszkało na wiyrchu nad tym pomiyszkaniym, co gorało. Ludzie ci powyskakowali z balkōnōw a żodyn z nich niy przeżōł. Jo żech tam niy bōł we Boguminie w tym czasie, jak gorało, ale tak se myśla, czy wszyscy ci ludzie musieli doprowdy skokać z tego balkōna?

Niy ma to pisane po to, coby kogoś rozliczać, szukać winnego, abo sie wymōndrzać. Chca pokozać ludziōm na prziszłość, co trza zrobić, jak pod Wami gore. Jak zaczyno co goreć, tōż kurz a hyc idzie do gōry, a ôtwarci ôkna, abo dźwyrzi je „zaproszyniym” tego kurzu, hycu, a za chwila i ôgnia do sia. Praje na ôpak: trza pozawiyrać ôkna, dźwiyrze, pozatykać szpary mokrymi szmataki a ô pōmoc trza wołać bez mobilniok. Jak zaczyno brakować luftu, to trza legnyć na delōwka (przi ziymi je najmynij kurzu a najwiyncyj świyżego luftu. A trza dać fojermanōm te sztwierć godziny na przijechani a postawiyni drabiny, abo na przilecyni po schodach ze aparatami ucieczkowymi (flaszka z luftym, szlauch a nelōnbojtel na głowa), coby mōgli skludzić ludzi na dōł.

Roz jeszcze powiym: niy było mie we Boguminie, jak gorało, niy widzioł żech tego, ale ôtwarci ôkyn, abo dźwiyrzi wtedy, jak pod nami gore, to je dani cugu tej fojerze. Niy idzie stoć na balkōnie, niy idzie tyż uciekać po schodach, bo styknōm dwa dychy a ôstaniecie na tych schodach. Trza pozawiyrać sie we izbie a czakać na pōmoc. Trza yno ôdynknyć dźwiyrze kluczym, coby fojermany niy musiały ôtwiyrać kożdych dźwiyrzi brechōm (skoda czasu a dźwiyrzi).

Wyskoczyć idzie dycko, ale zrobić idzie to we swojij chałupie ze piyrszego sztoka na trownik, abo wtedy, jak już je ôgyń za wami. We piyrszej chwili trza sie ôd tego kurzu a ôgnia ôdgrodzić a  czakać na pōmoc.

Dalszŏ tajla artykułu niżyj

Fojerman