Niy ma nadzieje dlŏ ludzkości, 5.08.2018
- do paple
- do patrzyniŏ
- do praniŏ
Katowice z miasta ôgrodōw umiyniyły sie w tym tydniu na miasto miyłości. Wiycie, jak to niyrŏz je, że wypijecie dwa piwa za wiela i chytŏ wŏs spanie? Tōż synek z dziouchōm w nocy z niydziele na pyńdziałek niy chcieli iś spać, chociŏż po prŏwdzie chcieli lygać. Wziōnli sie za robotã na ławce kole Urzyndu Miejskigo, ale niy skōńczyli, bo ôba usnyli. Tak ich znŏdli ludzie we pyńdziałek rano.
To skuli klimatu Katowic ludzie sie barzij przajōm. Gŏdōm wōm.
Zdrzōdło: Infokatowice.pl
Dalszŏ tajla artykułu niżyj
Idzie sie pogorszyć na siebie i sie powadzić. Kożde małżyństwo tak mŏ. Jedna sześdziesiōnt dziewiyńć lŏt starŏ baba we amerykańskim stanie Arkansas tak sie pogorszyła na swojigo chopa, iże kupiōł sie na kablōwce abōnamynt na filmy porno. Ôna tyn abōnamynt ôdkŏzała, ale chop go nazŏd ôbsztalowoł i patrzoł sie na telewizōr we jejich laubie. Baba mu kŏzała wyjś, ale ôn niy chcioł, tōż poszła do dōm, wziōnła pistōlã, wrōciyła, strzylyła dō niego dwa razy i zazwōniyła po pogotowie. Chop niy przeżōł, a ôna trefiyła do heresztu.
Popatrzałaby z nim, to by sie tak niy gorszyła.
Zdrzōdło: Daily Mail
Jeszcze nigdy nasz przeglōnd niy bōł taki anatōmiczny jak w tym tydniu. Amerykańske Cyntrum Kōntrole Chorōb napisało takigo twita:
„Gŏdōmy to, bo ludzie take coś robiōm: Niy myjcie ani niy używejcie drugi rŏz kōndōmōw! Używejcie nowego do kożdego kōntaktu seksualnego.”
Szok, pra? Kożdy wiy, że sie niy myje, ino przewrŏcŏ na lewõ strōnã. A tak naprŏwdã, to samo to, iże trza było ludziōm ô tym spōminać padŏ nōm, jake my sōm gupielŏki jako ludzkość. Kōncka gumy niy poradzymy do porzōndku użyć.
Przidzie dziyń, że ludzie bydōm sie kōndōmy sztrykować.
Zdrzōdło: CNN
We say it because people do it: Don’t wash or reuse #condoms! Use a fresh one for each #sex act. https://t.co/o3SPayRf9m pic.twitter.com/AwkPqE9YMl
— CDC STD (@CDCSTD) 23 July 2018