Niy ma nadzieje dlo ludzkości, 28.07.2019
- astrōnautōw niy bydzie,
- roz Adler, a roz niy,
- ôwca na sterydach.
Niydowno była piyńćdziesiōnto rocznica lōndowanio na miesiōncu, tōż LEGO zrobiyło małe badanie postrzōd bajtli we USA, Wielkij Brytaniji i we Chinach, i spytało je, za kogo chcōm sie uczyć, jak urosnōm. We Chinach 56% chce być za astrōnautōw, a 52% za rechtorōw. We USA i Wielkij Brytaniji ale za astrōnautōw chce sie uczyć ino 11% bajtli, a trzi razy tela chce być youtuberami abo vlogerami.
Chciało by sie pedzieć, że ôstowo ino nadzieja, że nasze bajtle sōm mōndrzejsze, ale dyć artykuł mo we tytule, że tyj nadzieje niy ma.
Zdrzōdło: Business Insider
Dalszŏ tajla artykułu niżyj
Koalicja Polski Śląsk to sōm richtich łowcy ludzi, co niy majōm reszpektu do gōrnoślōnskigo ôrła. Detektywi Koalicyje miesiōnc tymu pisali, iże Łukasz Kohut, nowy europoseł, chodzi we koszulce ze „ymblymatym RAŚ”, ale jak ino Grzegorz Kulik postawiōł tyn sōm „ymblymat” kole dyngi, to zaroz to już podle nich bōł „ôreł gōrnoślōnski”, co noleży dō nich, i ôstoł „sprofanowany”. Jak ftoś im napisoł we kōmyntorzu, że dyć pisali, że to je znak ôd RAŚ, to ze interpōnkcyjōm majstrōw ôdpedzieli, że ôni tak dyć niy pisali.
Fajnie, że sie przekōnujōm do Adlera, ale z tego łganio to już na zicher nosym mōnitōr wyciyrajōm.
Jak już godōmy ô łowcach, to ôwca we USA wygrowała wszyjske kōnkursy i kożdy bōł niōm zachwycōny. Aż na dożynkach we grofstwie Logan we Ohio weterynorze znodli we jij ôrganiźmie sterydy. Wyglōndo na to, że ôwca była futrowano ekstra lykami, co skuli nich muskle ôd ôwce zdowajōm sie, jakby było w nich mynij fetu.
Widzicie? Dzisiej sterydy, a za 20 lot metalowe szłapy. I bydzie ôwca androjidōw.
Zdrzōdło: Fox News
Seems PED’s transcend human sport into livestock even, people willing to do whatever to have an advantage over the competition #kin110summer https://t.co/MER36wZ5U2
— Hudson Paul (@hudsonkin110) July 21, 2019
