Niy ma nadzieje dlo ludzkości, 21.07.2019
- sztuka rozwiōnzuje problymy,
- hica rozwiōnzuje przestympczość,
- prawo rozwiōnzuje gupota.
We Acklam, dzielnicy Middlesborough we Angliji kōmuś sie zmierzło proszynie Urzyndu Miasta, żeby sprawiōł dziury we drōgach. Ludzie rok czekali, aż dziury sie stracōm, i nic. Aż ftoś szpejym naszmarowoł sroge puloki naôbkoło dziur i ône sie zaroz straciyły. Artysta – aktywista nazywo sie Wanksy. Tak jak Banksy, ino ze „W” na przodku, a, „wank” po angelsku znaczy… hm… glancować pyrlika.
A zdowało by sie, że sztuka niy rozwiōnzuje dziynnych problymōw.
Zdrzōdło: Truth Theory
Dalszŏ tajla artykułu niżyj
Policyjo we Massachusets we USA ôpublikowała na Twitterze prośba, żeby niy łōmać prawa do pyńdziałku. Powōd? Za gorko. We Massachusets tymperatura bez weekend dochodzi do 39 stopni. Policyjo pado, żeby ôstać w dōma, włōnczyć klima, popatrzeć na „Strange Things”, pobawić sie FaceAppym, abo poćwiczyć karate we pywnicy.
Na zicher bydzie pokōj.
Zdrzōdło: CNN
Dwoje misjōnorzōw z Tasmanije, co noleży do Australije, musi zapłacić Australijskimu Urzyndowi Dowkowymu bez dwa milijōny dolarōw australijskich zaległych dowek. Ôni ze swojōm sprawōm doszli aż do Nojwyższego Sōndu Tasmanije, a jejich argumynta, czymu niy płacōm dowek, były blank proste: płacynie dowek je przeciwko woli Boga. „Na tyn kroj, po jego ôdchodzie ôd jurysdykcje Boga, spadły już klōntwy suszy i bezpłodności” – pedzieli przed syńdzōm. Ale jego to niy przekōnało. „Jak mi niy możecie znojś cytaty we Bibliji, kaj stoji »niy bydziesz płacić dowek«, to rozumiycie, czymu ciynżko mi znojś jakiś poczōntkowy pōnkt.” – pedzioł im.
Ci misjōnorze chyba niy doczytali do „Ôddejcie Cezarowi to, co noleży do Cezara, a Bogu to, co noleży do Boga.”
Zdrzōdło: ABC News
