Na gōrnoślōnskich szportplacach, 19.05.2019
Yntlich! Gōrny Ślōnsk mŏ zajś majstra we fusbalu! Po 30 latach czekania we lidze polskej, bo ôstatni majster z Gōrnego Ślōnska przed Piastym bōł we lidze czeskej we 2004 roku dlŏ Banika Ôstrawa.
Gratulujymy Piastowi, ô kerym wiyncej poczytŏcie we artykułu Marcina Musiała.
A co jeszczy we fusbalu we ôstatnich dniach?
Górnik Zŏbrze dostoł na kōniec sezōnu szwōngu i wygroł zajaś szpil. Tera aże 3-0 we Kielcach ze Korōnōm. Dziynki tej wygranej Górnik Zŏbrze skōńczōł liga na 11 placu.
Dalszŏ tajla artykułu niżyj
A co na połedniowych krańcach Gōrnego Ślōnska? Banik Ôstrawa urwoł punkty nowymu majstrowi ligi czeskej. Zremisowoł u siã ze Slaviōm Praga 0-0 i skōńczōł na 6 placu. Te same manszafty trefiōm sie zajś we strzoda we Ołomuńcu, kiedy ô siōdmyj zagrajōm ô Puchar Rep. Czeskej. Szpil bańdzie szło ôbejrzeć live na CT Sport.
We grupie, kaj grŏ sie ô utrzimanie MFK OKD Karwina przegrała u siã 0-1 ze Bohemians Praga, a SFC Ôpawa wygrało 2-1 ze 1. FK Przibram. SFC Ôpawa skōnczyła 12 placu, a Karwina czekŏ walka ô utrzimanie.
Handbal
We lidze czeskej już yno jedyn szpil ôd majstra je HC Banik Karwina. Manszaft ze Gōrnego Ślōnska wygroł już 2 szpile, a grŏ sie do trzech wygranych. Co ważniejsze, we niedziela przełōmali Pilzno i wygrali u nich. We strzoda czekŏ jych szpil we Karwinie i jak go wygrajōm, to ôstanōm zajś majstrym Rep. Czeskej we handbalu.
Rezultaty finałowych szpilōw:
Talent Robstav M.A.T. Pilzno – HC Banik Karwina 31-27
HC Banik Karwina – Talent Robstav M.A.T. Pilzno 28-24
Talent Robstav M.A.T. Pilzno – HC Banik Karwina 22-29
We lidze polskej do sporej synsacyji doszło we piyrszym halbfinale na szpilu we Ôpolu, kaj miejscowŏ Gwardia wygrała ze etatowym polskim majstrem, Vive Kielce 32-31. We Kielcach ale bōło już 37-28 dlŏ Vive i to ôni wleźli do finału. Gwardii Ôpole ôstatnie szpil ô 3 plac.
Foto tytułowe: Marcin Musiał
