Aleksander Lubina: Adwentowe rzykanie #1

Rzykanie we 1. dycymbra 2018

Bożyczku Wy mōj
a niy zechcieliby Ôni gōdać mi za jedno?
a niy zechcielibyście mie tak trocha do sia ôśmielić?
pōklachaliby my chwilka
pōgrali we szacha eli szkata
ôbejrzeli jaki szpil

pedzielibyście mi
jako to mōm spokōpić tyn świat chōcia krzynka
hercym kapeczka pōchytać filipa

pōkludzilibyście mie miyndzy strōmami cestōm ku dandze

Dalszŏ tajla artykułu niżyj

mōżno zezwōlilibyście poôsprawiać z Mamulkōm ô jei kwiōtkach:
żabiłōczkach, siyrōtkach, kōkōcich galōtach, kapucynkach,
nelkach, tulpach, gladiōlach, piwōwońkach, jadwiżkach,
ô pysznych jankach
kere miała tak rada

dalibyście pedzieć Tacikōwi
pōczamu żech te strzewiki we Piyrszō Komunijŏ tak paskudnie zmarasił
mōżno by mi terōzki przez szmarōw wybōczył
bo sie strachōm lyjtōw drugi rōz
tam u Wōs we gōścinie
tam u Wōs we niebie

a niy dałōby sie tak do nich
do mamulki i do tatulka
na Wszyjskich Świyntych ôbsztalować
jakiego anielskiego chōru
cōby Michōł ze Gabriylem
im świycili
wachōwali na kirhōfie
dŏwali pozōr na lampki
i im po cichutku nucili

Aleksander Lubina

Górnoślązak/Oberschlesier, germanista, andragog, tłumacz przysięgły; edukator MEN, ekspert MEN, egzaminator MEN, doradca i konsultant oraz dyrektor w państwowych, samorządowych i prywatnych placówkach oświatowych; pracował w szkołach wyższych, średnich, w gimnazjach w szkołach podstawowych i przedszkolach, literat tworzący po polsku, po śląsku, po niemiecku, publicysta, współtwórca KTG Karasol.

Fotografie: Aleksander Lubina i Joanna Jakóbik