Latosi Marsz na Zgodã ruszy 26 stycznia
Dziyń Pamiyńci ô Tragedyji Gōrnoślōnskij latoś przipadŏ w niydzielã, 27 stycznia. Dziyń wcześnij, we sobotã, 26 stycznia, ze Placu Wolności w Katowicach ruszy Marsz na Zgodã.
Marsz na Zgodã piyrszy rŏz bōł ôrganizowany we 2009 roku bez Ruch Autōnomije Ślōnska i dycki prowadziōł ôd Placu Wolności pod bramã byłego polskigo lagru kōncyntracyjnego Świyntochłowice Zgoda. Marsz symbolicznie czci pamiyńć ôfiar Tragedyje Gōrnoślōnskij.
Tragedyjŏ Gōrnoślōnskŏ to masowe represyje sowiecke i polske na ludności cywilnyj Gōrnego Ślōnska skuli jejich nŏrodowości w latach 1945-1946. Cołki polski aparat terroru bōł słożōny miyndzy inkszymi z milicyje, prokuratury, aparatu bezpieczyństwa i lagrōw. Z tych ôstatnich nojbarzij znane to Zgoda, Mysłowice, Łambinowice i Jaworzno. Heresztowani żyli we tragicznych warōnkach i byli czynsto torturowani. Sużyli tyż za zdrzōdło niywolniczyj roboty na grubach, hutach i inkszych werkach.
Inkszŏ czyńść Tragedyje to wywieziynie do Zwiōnzku Sowieckigo nojmynij 45 tysiyncy ôsōb. Tam, tak samo jak ci trzimani we Ślōnsku, robiyli za niywolnikōw we werkach. Władze wojewōdztwa ślōnskigo z tamtego czasu starały sie ô jejich powrōt, ale wielu z nich nigdy niy ôbejzdrzało zaś swojij ziymie.
Dalszŏ tajla artykułu niżyj
Marsz na Zgodã zacznie sie 26 stycznia, w sobotã, ô 11:40 na Placu Wolności we Katowicach.
Marsz na Zgodę 2018 (nagranie i zdjęcia: Jacek Tomaszewski)