Kraj Morawskoslōnski: nojlepsze hotele ze Ślōnska
Latoś we 9. edycyji kōnkursu Czech Hotel Awards na nojlepsze hotele zajś piyrsze 3 place we kategoryji hotelōw 3-gwiazdkowych szafły ôbiekty ze ślōnskej strōny. Piyrszy plac zajōn Horský hotel Excelsior we Gōrnej Łōmnej wele Jablōnkowa, drugi plac hotel Pod Zeleným Dubem we Starym Bohuminie, a trzeci Hotel & Caffe Silesia we Fridku-Mistku.
Hotel Pod Zeleným Dubem, kaj łōnczōm dwa brzegi Ślōnska, je dobrze znany dlŏ wielu ślōnskich turystōw, kaj ôkrōm hotelu znojdziecie jeszczy restauracyjŏ a piwne i muzyczne SPA. Łōńskego roku przijechało sam na bezuch przeszło 5 tysiyncy gości.
Latoś we kōnkursie wziōnło udział 1.200 ôbjektōw, skuli czego Adam Wowra – gospodŏrz hotelu a restauracyji Pod Zeleným Dubem, mŏ ta nagroda fest w zŏcy: “Sōm my fest radzi, bo cyniymy zaufaniy naszych klijyntōw i robiymy wszystko, coby je utrzimać. Ale miast fajerować liczymy durch straty. Korōnawirus fest zaszkodziōł hotelōm i restauracyjōm. My sōm do tego blank przi granicy na rzyce Ôdrze, kerŏ je durch zawartŏ, a klijynci ze pōłnocnej tajli Ślōnska to srogŏ czynść naszych gości.”
