Kōnopije indyjske we szranku

Szandarzi kryminalni z Cieszyna chyciyli chopa podyjzdrzanego ô hodowanie kōnopiji indyjskich. W pōmiyszkaniu ôd 29-latka policyjōny znŏdli 6 dōnic kerzōw i bez 250 gramōw marihuany. Za to przestympstwo grozi do 10 lŏt heresztu.

Policyjōny z cieszyńskiego wydziału kryminalnego uzdali, iże w pōmiyszkaniu na jednym z ôsiedli w Cieszynie, lokatōr mioł hodować kōnopije indyjske.

Jak szandarzi zaklupali na dźwiyrze z pōmiyszkaniŏ i weszli do postrzodka poczuli charakterystycznõ wōń, co ino potwierdziyła, iże jejich dōmysły były akuratne. Chop zachowywoł sie nerwowo. Skŏzoł niyskorzij policyjōnōm, kaj w jednyj z izbōw, we szranku hoduje kōnopije indyjske. Policyjōny zabezpieczyli 6 kerzōw konopiji jak tyż sprzynt do jejich ôbrŏbianiŏ. Ôkrōm tego w pōmiyszkaniu funkcjōnariusze znŏdli jeszcze bez 250 gramōw marihuany.

Policyjōny przedstawiyli 29-latkowi ôbskarżynie hodowle konopije indyjskij i posiadaniŏ srogij wielości narkotykōw. Za to przestympstwo chopowi zgodnie z ôrdōnkym ô szperowaniu narkomanije grozi do 10 lŏt heresztu. Ô jego dalszym losie uzdŏ prokuratōr i gyricht.

Fot: KPP Cieszyn

[foogallery id=”3508″]