Hanysy i Gorole – szpil RPG po naszymu i po polsku

Prawie pokŏzoł sie darmowy, kōmedyjowy szpil RPG zrychtowany ôd Artura Ganszyńca. „Hanysy i Gorole” to je szpil ô tożsamości, kamractwie i gupich idyjach, kery sie rozgrŏwŏ na magicznym Ślōnsku we szyroko pojyntych alternatywnych latach 80. XX stoleciŏ. Bydziecie grać jako grupa kamratōw, co sie trefiajōm we laubie na działkach i chcōm se po prostu po leku przepyndzić czas. Ino tak sie jakoś dzieje, eli zrzōndzyniym losu, eli bez przipŏdek, eli bez ich włŏsne gupie idyje, iże chopy durch wpadajōm w kłopoty.

Za inspiracyje szpil biere m.in. take ksiōnżki i filmy jak:

• Kōmisorz Hanusik, kryminalne rōmany z elymyntami fantasy ôd Marcina Melona
• Utropy Micyny, kryminalno kōmedyjo ôd Adriana Katroshiego
• Klan wampirów, czŏrnŏ kōmedyjŏ ôd Jerzego Buczyńskiego
• Bery i bojki śląskie Stanisława Ligonia
• Angelus, film ôd Lecha Majewskiego
• Święta wojna, polski kōmedyjowy serial
• Cholonek, czyli dobry Pan Bóg z gliny, rōman ôd Janoscha
• Sąsiedzi, czechosłowacki animowany serial
• Chłopaki z baraków, kanadyjski mockumentalny serial

„Hanysy i Gorole” majōm dwie jynzykowe wersyje: ślōnsko i polsko. Niy sōm ône ale jednakie! To, kieryj grŏcz bydzie używoł, wpływŏ na dostympne ôpcyje w mechanice szpilu.

Autōr szpilu to Artur Ganszyniec, projektant szpilōw i ôzprŏwek. Bezmała dwajścia lŏt rychtuje fabuły, scynariusze a robi za rechtora projektowaniŏ. Robiōł przi piyrszym a drugim kōmputrowym Heksŏrzu (The Witcher, The Witcher 2) i inkszych szpilach (ôd CD Projekt RED, Techlandu, 11 bit studios a inkszych). Ślōnzŏk z Tarnowskich Gōr.

Szpil dostympny je (na faty!) tukej.