Francek Fyrtok, 27.03.1921

Wachtyrz prezyntuje ślōnske artykuły ze starych cajtōngōw przepisane do alfabetu ślabikŏrzowego. Trzeba je rozumieć we kōntekście historycznym i niy przedstawiajōm ône ôpiniji ôd redakcyje.

Kochany Hanysie!

Miołbych ci dużo do powiedzynio, ale czasu mōm mało. Głosowanie plebiscytowe było i tak i tak. Mōmy nojwiyncej gmin za Polskōm i mōmy też wiynkszość głosōw za Polskōm. Ale tam, kaj sie kōńczyły nasze Boże strōny, Niymcy granatami i gwerami zmusili naszych ludzi do głosowania za Niymcami. Czynsto było tam jawne głosowanie, bo tak zarzōńdzili Niymcy.

Koalicyo bydzie musiała podszukać wszystko i naprawić niymiecke niesprawiedliwości, fałszerstwa i gwałty przi głosowaniu. Ale już nie naprawi wszystkego i Ślōnsk bydzie musioł być podzielōny. Do Polski pōjdzie krys pszczyński, rybnicki, strzelecki, lubliniecki, tarnogōrski, gilwicki, zobrski, katowicki i bytōmski. Zaś reszta Gōrnego Ślōnska musi być podzielōna pōmiyndzy Polsko a Prusy. Tam, kaj Niymcy głosowali granatami, tam Ynglicy powinni zaprowadzić porzōndek. ażeby na Ślōnsku nie było Irlandyji. Tako jest moja polityka. Iże Niymcy kłamiōm, iże napadajōm i mordujōm, to świynto prowda. Ale sōm też tacy, co już uciekajōm na pioski brandynburske. Nasz norōd musi mieć ôd koalicyji ôpieka i ôchrōna, bo inaczy moji koleksy zacznōm Niymcōw huśtać. A musi być spokōj aż do zatwierdzynia głosowania u ambasadorōw w Paryżu. Ô libstach napisza ci pōźniej – teraz ci moga jyno pedzieć, że w śmiergust byda dziołchy loł, tak jak w inne lata. Libsty ôbiecały mi dużo kroszōnek, byda sikoł, tak jak mie tu widzisz na ôbrozku. Spodziewōm sie, że i ty bydziesz sikoł.
Francek Fyrtok.

Dalszŏ tajla artykułu niżyj