Blogi

Fojerman: Co łaska

2019.12.31

Co łaska

Narodziōł sie roz Pōnbōczek
Na Ślōnsku we familoku.
Niy ôtwar żeś jeszcze ôczek,
A już kuckosz tak, boroku.

Prziszły ciotki, potki starki,
Prziniōsły Dzieciōntku darki.
Kożdy prziniōs to, co łaska:
Bōmbōn, piernik, jako graczka,
Pōnbōczkowi małymu.

Dalszŏ tajla artykułu niżyj

Tak tam zima je na dworze,
Dziecko zmarznie, niy dej Boże,
Tōż posłała baba chłopa:
Prziłōż szlymy pora łopat.

Prziszły ciotki, potki starki,
Prziniōsły Dzieciōntku darki.
Kożdy prziniōs to, co łaska:
Bōmbōn, piernik, jako graczka,
Pōnbōczkowi małymu.

Niy chca szkloka, niy chca kustu,
Dejcie mi świyżego luftu,
Bo sie dusza sam w tym smogu,
Ciynżko dycho sie i Bogu.

Prziszły ciotki, potki starki,
Prziniosły Dziecintku darki.
Kożdy prziniōs to, co łaska:
Filter luftu a gazmaska,
Pōnbōczkowi małymu.

Stasiek Neblik, ps.”Fojerman” – Ślōnzok, fojermōn na pynzyji, autor ksiōnżki ”Do rymu po naszymu, abo ślōnski miszmasz” a autor „Dykcjōnorza Godki Ślōnskij”, człōnek DURŚ.

www.fojerman.pl
www.dykcjonorz.eu

Społym budujymy nowo ślōnsko kultura. Je żeś z nami? Spōmōż Wachtyrza

Neblik Stanisław

Stasiek Neblik, ps.”Fojerman” – Ślōnzok, fojermōn na pynzyji, autor ksiōnżki ”Do rymu po naszymu, abo ślōnski miszmasz” a autor „Dykcjōnorza Godki Ślōnskij”, człōnek DURŚ.

Ôstŏw ôdpowiydź