Ewa Grzesik: OSTERREITEN [+fotogaleryjŏ]
Wielkanocny pyńdziałek nikierzy już godajōm „Świyta, świyta i po świytach, ale nie tu w powiecie raciborskim, kaj we sztyrech wioskach: Pietrowicach Wielkich, Zawadzie Książęcej, Bieńkowicach i Sudole kultywowano je ôd ok. 1700 roku tradycyjo dziynkczynno-błagalno procesyjōw kōnnych po polach.
Jo trefiłach genau do miejscowości Sudōł, kaj zjechali sie wszyscy tutejsi gospodorze i ci kierzy przajōm jeździe kōnnej. Byli uczestniki ze Krakowa, Czech a nawet Monachium.
Wszyscy uczestnicy przy muzyce dechowi zbierajōm sie na drodze i czekajōm aż farorz pokropi cało procesyjo poto, żeby żodnymu z uczestnikōw nic złego sie nie stało i nie doszło do żodnego nieszczyńśliwego wypadku, bo i do takich niekiedy tyż dochodzi. Takigo kōnika trza przigotować, nie yno pod wzglyndym estetycznym ale i psychicznym, bo nie wszystkie na co dziyń widzōm tela ludzi i mogōm być nerwowe.
Na samym przodku rajtujōm jeźdźcy ze sztandarami i trzimiōm krziż i figurka Chrystusa Zmartwychwstałego, a za nimi cały korowōd ôroz zacni goście: Ks. Bp archidiecezji katowickiej Grzegorz Olszowski, Prezydent miasta Raciborza Dariusz Polowy i wiceprezydent Michał Fita. Potym wszyscy wyruszajōm całōm procesyjōm na pola, kaj przi trzech krzyżach zwanych „Urbankami” rzykajōm ô dobre plōny i urodzaj. Całōm drōgōm śpiywo sie ”Litanijo do Wszystkich Świyntych” na specjalno melodijo, kiero je znano yno w tych miejscowościach.
Dalszŏ tajla artykułu niżyj
Tutejsi mieszkańcy gynau nie pamientajōm daty tego zwyczaju i godajōm, że je ôn ôd pōnad sto lot i ôd zawsze, i nie wyôbrażajōm sie świōnt bez niego, i chocioż nikiedy padze dyszcz abo sypie śniegiym, bo na Wielkanoc mōmy przeca roztōmańto pogoda, to nie brakuje sam chyntnych do udziału w procesyji jak i samych mieszkańcōw, kierzy kibicujōm i podziwiajōm piykne stroje uczestnikōw. Nojpiykniejszym do mie ôbrozkiym było, jak dwie procesyje sudolsko i bieńkowidzko, w oddali prawie, że na horyzoncie w szczerych polach sie łōnczyły, a potym kożdo z nich poszły w swoja strōna, by na drodze ci co rajtujōm mogli sie pościgać i zakończyć procesyjo.
Jak my naliczyli latoś było 86 kōni, bez mała to mało, bo trefiajōm sia lata, kaj było ich kole 120 i wiyncyj, ale i tak czy było ich mocka czy ni, to widok tak piyknie wyglancowanych koni, ich tupot po drōdze i cały tyn widok prziprawio ô gynsio skōrka, a jo ze łezkōm w ôku prosiłach Pōnbōczka, żeby takie tradycje trwały jak nojdłużyj…
Jak chcecie przeżyć richtig piykne i inksze ôd wszystkich do tej pory świynta Wielkanocy, to przijedźcie na do nos na OSTERREITEN w ôkolice Raciborza.
Ewa Grzesik
Miyszkōm w Raciborzu, robia na banie fest, przaja tymu miastu i ślōnskej godce, mōm swoje lata, ôdchowane bajtle, a teroz sie chyciłach pisanio. Laureatka kōnkursu „Po naszymu, czyli po Ślōnsku” w 2017 roku o tytuł “Ślōnzoka Roku”. Jak mōm trocha czasu to ôdnowiōm jakeś stare meble.