Zapŏlōł sie balōn z ludźmi

Lecieli podziwiać wschōd słōńca. Miało niy braknōńć wrażyń i tak sie stało. Czasza balōnu zahŏczyła ô linijõ ynergetycznõ i wziōnła sie pŏlić. Take prawie zgłoszynie dostoł dinst pawłowskigo kōmisariatu policyje w sobotã rano.

Na miyjsce pojechali szandarzi. Pokŏzało sie, iże naprŏwdã uciyrpioł ino balōn, a barzij materyjŏ z jego czasze. Przi lōndowaniu tykła sie ôna ze kablami, co w nich przepływŏ sztrōm i doszło do zwarciŏ instalacyje i zapŏlyniŏ balōnu. Na szczyńście, w tym czasie kosz, co w nim siedzieli ludzie, bōł już na tela nisko, iże piyńcioôsobowŏ grupa mogła bezpiycznie z niego wyskoczyć. Skuli tego, iże tajla balōnu zawisła na kablach, potrzebnŏ była tyż interwyncyjŏ pogotowiŏ ynergetycznego i fojermanōw.